സൗരോർജം കൊണ്ട് സഞ്ചരിക്കുന്ന കാറുമായി നെതർലൻഡ്സ് ആസ്ഥാനമായുള്ള സോളാര്‍ ഇലക്ട്രിക് വെഹിക്കിള്‍ സ്റ്റാര്‍ട്ടപ്പ് കമ്പനി ലൈറ്റ്ഇയർ. വാഹനം ഇപ്പോൾ ബുക്ക് ചെയ്യാമെന്നും നവംബർ മുതൽ വിതരണം ആരംഭിക്കുമെന്നും കമ്പനി പറയുന്നു. ലൈറ്റ്ഇയർ 0 എന്ന് പേരിട്ടിരിക്കുന്ന കാർ ഈ വർഷം അവസാനം വിപണിയിലെത്തും. ലോകത്തിലെ ആദ്യ പ്രൊഡക്ഷൻ റെഡി സോളാർ കാർ ആണിത്. 263,000 യുഎസ് ഡോളര്‍ ആണ് കാറിന്റെ വില.
നാലുപേർക്ക് സഞ്ചരിക്കാവുന്ന ഈ കാറിന് ദിവസവും 70 കിലോമീറ്റർ സൗരോർജത്തിൽ മാത്രം സഞ്ചരിക്കാനാവും. സോളാറിനൊപ്പം സാധാരണ ഇലക്ട്രിക് കാറുകളെപ്പോലെ ചാര്‍ജ് ചെയ്തും ലൈറ്റ്ഇയര്‍ 0 ഉപയോഗിക്കാം. ഒരു പ്രാവശ്യം ചാർജ് ചെയ്താൽ 624 കി.മീ റേഞ്ചുണ്ട് വാഹനത്തിന്. കാറിന് മുകളിലാണ് സോളാര്‍ പാനലിന്റെ സ്ഥാനം. അഞ്ച് സ്ക്വയർ മീറ്റർ സോളാർ പാനൽ വർഷത്തിൽ 11,000 കിലോമീറ്റർ വരെ സഞ്ചരിക്കാനുള്ള ചാർജ് ഉണ്ടാക്കാൻ സാധിക്കും. ദിവസവും 35 കിലോമീറ്റർ സഞ്ചരിക്കുന്ന ഒരാൾക്ക് വാഹനം 7 മാസത്തിൽ ഒരിക്കൽ മാത്രം ചാർജ് ചെയ്താൽ മതിയെന്നും കമ്പനി പറയുന്നു.
