ന്യൂ ഡൽഹി: സുപ്രധാന വകുപ്പുകളിൽ വലിയ മാറ്റമില്ലാതെ മൂന്നാം മോദി സർക്കാരിന്റെ വകുപ്പ് വിഭജനം. ഘടകകക്ഷികളുടെ സമ്മര്‍ദ്ദം പരിഗണിക്കാതെ സുപ്രധാന വകുപ്പുകളെല്ലാം ബിജെപി കൈയില്‍ വച്ചു. ആഭ്യന്തരമന്ത്രിയായി അമിത് ഷാ വീണ്ടുമെത്തുന്ന മന്ത്രിസഭയിൽ പ്രതിരോധ മന്ത്രി കസേരയില്‍ രാജ്‌നാഥ് സിംഗ് തുടരും. ധനമന്ത്രലായത്തിന്റെ ചുമതല നിര്‍മ്മല സീതാരമന് തന്നെ വീണ്ടും നൽകി. വിദേശകാര്യം മന്ത്രാലയത്തിന്റെ അമരക്കാരനായ എസ് ജയ്‌ശങ്കറിനെയും മോദി മാറ്റിയില്ല. വാണിജ്യ മന്ത്രാലയത്തില്‍ പിയൂഷ് ഗോയലിനെയും, വിദ്യഭ്യാസ മന്ത്രാലയത്തില്‍ ധര്‍മ്മേന്ദ്ര പ്രധാനെയും നിലനിര്‍ത്തി. അശ്വിനി വൈഷ്ണവിന് വലിയ പ്രമോഷന്‍ നല്‍കി റയില്‍‌വേക്കൊപ്പം വാര്‍ത്താ വിതരണം, ഐടി എന്നീ മൂന്ന് സുപ്രധാന മന്ത്രാലയങ്ങളുടെ ചുമതല ഏല്‍പിച്ചു. ബിജെപി ദേശീയ അധ്യക്ഷൻ ജെപി നദ്ദക്ക് ആരോഗ്യ മന്ത്രാലയം നല്‍കി. ശിവരാജ് സിംഗ് ചൗഹാന് കൃഷി മന്ത്രാലയവും നൽകി.
ഘടക ക്ഷിയായ ടിഡിപിക്ക് വ്യോമയാന മന്ത്രാലയം നല്‍കി. ടിഡിപി അംഗം റാം മോഹന്‍ നായിഡുവാണ് മന്ത്രി. ജെഡിഎസിൽ നിന്ന് എച്ച്ഡി കുമാരസ്വാമിക്ക് ഘന വ്യവസായ മന്ത്രാലയമാണ് നല്‍കിയത്. ലോക് ജനശക്തി പാര്‍ട്ടിയിൽ നിന്ന് മന്ത്രി പദവിയിൽ വീണ്ടുമെത്തിയ ചിരാഗ് പാസ്വാന് സ്ഥിരം നല്‍കുന്ന ഭക്ഷ്യ സംസ്കാരണ വകുപ്പാണ് ഇക്കുറിയും നല്‍കിയത്. ജെഡിയുവിന്റെ ലലന്‍ സിംഗിന് പഞ്ചായത്തി രാജിന്‍റെ ചുമതല നല്‍കി.
കേരളത്തിൽ നിന്നുള്ള സുരേഷ് ഗോപി ടൂറിസം, പെട്രോളിയം, പ്രകൃതി വാതകം സഹമന്ത്രിയാകുമ്പോള്‍, ജോര്‍ജ്ജ് കുര്യന് ന്യൂനപക്ഷ ക്ഷേമം, ഫിഷറീസ്, മൃഗസംരക്ഷണ മന്ത്രാലയങ്ങളുടെ സഹമന്ത്രി സ്ഥാനവും നല്‍കി.
മറ്റു വകുപ്പുകൾ
* ടെലികോം – ജ്യോതിരാദിത്യ സിന്ധ്യ
* വാണിജ്യം – പിയൂഷ് ഗോയൽ
* ഉരുക്ക് ,ഖന വ്യവസായം – എച്ച് ഡി കുമാരസ്വാമി
* തൊഴിൽ – മൻസുഖ് മാണ്ഡവ്യ
* ജൽ ശക്തി – സിആര്‍ പാട്ടീൽ
* വ്യോമയാനം – റാം മോഹൻ നായിഡു
* പാര്‍ലമെൻ്ററി, ന്യൂനപക്ഷ ക്ഷേമം – കിരൺ റിജിജു
* പെട്രോളിയം – ഹര്‍ദീപ് സിങ് പുരി
* വിദ്യാഭ്യാസം – ധര്‍മ്മേന്ദ്ര പ്രധാൻ
* എംഎസ്എംഇ – ജിതൻ റാം മാഞ്ചി
* കായികം – ചിരാഗ് പാസ്വാൻ
* വനിത ശിശു ക്ഷേമം – അന്നപൂര്‍ണ ദേവി
* ഷിപ്പിങ് മന്ത്രാലയം – സര്‍വാനന്ദ സോനോവാൾ
* സാംസ്കാരികം, ടൂറിസം – ഗജേന്ദ്ര സിങ് ഷെഖാവത്ത്
* പരിസ്ഥിതി – ഭൂപേന്ദ്ര യാദവ്
* ഭക്ഷ്യം – പ്രൾഹാദ് ജോഷി
* സ്റ്റാറ്റിസ്റ്റിക്സ്, പ്ലാനിങ് സാംസ്കാരികം സഹമന്ത്രി – റാവു ഇന്ദര്‍ജീത്ത് സിങ് (സ്വതന്ത്ര ചുമതല)
* ശാസ്ത്ര സാങ്കേതികം, പിഎം ഓഫീസ് സഹമന്ത്രി – ഡോ.ജിതേന്ദ്ര സിങ് (സ്വതന്ത്ര ചുമതല)
* നിയമ വകുപ്പ് – അര്‍ജുൻ റാം മേഘ്‌വാൾ (സഹമന്ത്രി, സ്വതന്ത്ര ചുമതല)
* ആയുഷ് (സ്വതന്ത്ര ചുമതല) – ജാഥവ് പ്രതാപ്റാവു ഗൺപത്റാവു (ആരോഗ്യം കുടുംബക്ഷേമം സഹമന്ത്രി)
