ഇന്ധനവില വർധന കേരളത്തെ ഗുരുതര പ്രതിസന്ധിയിലാക്കുന്നതാണെന്ന് മുഖ്യമന്ത്രി വി.ഡി. സതീശൻ പറഞ്ഞു. ഉപഭോക്തൃ സംസ്ഥാനമായ കേരളത്തിലേക്ക് വിദൂര പ്രദേശങ്ങളിൽ നിന്നാണ് ചരക്കുകൾ ട്രക്കുകൾ വഴി എത്തുന്നതെന്നും അതിനാൽ ഡീസൽ വില വർധനയുടെ ആഘാതം സംസ്ഥാനത്ത് കൂടുതലായിരിക്കുമെന്നും അദ്ദേഹം വ്യക്തമാക്കി.
ഡൽഹിയിൽ നടത്തിയ വാർത്താസമ്മേളനത്തിലായിരുന്നു മുഖ്യമന്ത്രിയുടെ പ്രതികരണം. ഇന്ധനവില വർധനയുടെ ആഘാതം കുറയ്ക്കാൻ കേരളത്തിന്റെ നികുതി വിഹിതത്തിൽ ഇളവ് നൽകുന്നത് പോലും പരിഗണിക്കാതെ കേന്ദ്രം ദിവസേന വില കൂട്ടുകയാണെന്ന് അദ്ദേഹം വിമർശിച്ചു. സംസ്ഥാനത്തിന്റെ വിവിധ ആവശ്യങ്ങളും മുൻഗണനകളും പ്രധാനമന്ത്രിയെയും കേന്ദ്ര ധനമന്ത്രിയെയും അറിയിച്ചിട്ടുണ്ടെന്നും മുഖ്യമന്ത്രി പറഞ്ഞു. പെട്രോൾ, ഡീസൽ വില ലിറ്ററിന് മൂന്ന് രൂപ വീതം വർധിപ്പിച്ചതിന് പിന്നാലെയാണ് മുഖ്യമന്ത്രിയുടെ പ്രതികരണം.
അന്താരാഷ്ട്ര ക്രൂഡ് ഓയിൽ വില വർധനയും എണ്ണക്കമ്പനികളുടെ നഷ്ടവും ചൂണ്ടിക്കാട്ടിയാണ് കേന്ദ്ര സർക്കാർ വില കൂട്ടിയത്. എന്നാൽ ഈ തീരുമാനം ഗതാഗതച്ചെലവും അവശ്യവസ്തു വിലയും വീണ്ടും ഉയർത്തുമെന്ന ആശങ്ക വിവിധ സംസ്ഥാനങ്ങളിൽ ഉയരുന്നുണ്ട്.
