സൂറിച്ച്: ഇറ്റലിയിൽ നിന്ന് പോളണ്ടിലേക്ക് ട്രക്കിൽ കൊണ്ടുപോവുകയായിരുന്ന 12 ടൺ ചോക്ലേറ്റ് മോഷണം പോയി. സ്വിസ് ഭക്ഷ്യോത്പന്ന കമ്പനിയായ നെസ്ലെയുടെ പ്രശസ്തമായ കിറ്റ്കാറ്റ് ചോക്ലേറ്റ് ബാറുകളാണ് കവർച്ച ചെയ്യപ്പെട്ടത്.ഈസ്റ്റർ പ്രമാണിച്ച് വിപണിയിൽ പുതുതായി ഇറക്കിയ ചോക്ലേറ്റ് ബാറുകളായിരുന്നു ട്രക്കിലുണ്ടായിരുന്നത്. മധ്യ ഇറ്റലിയിൽ നിന്ന് യൂറോപ്പിലെ വിവിധ ഭാഗങ്ങളിലെ വിതരണത്തിനായി പോളണ്ടിലേക്ക് പോകുന്ന വഴിക്കാണ് സംഭവം നടന്നത്. കവർച്ച ചെയ്യപ്പെട്ട വാഹനത്തെക്കുറിച്ചോ അതിന്റെ ഡ്രൈവറെക്കുറിച്ചോ നിലവിൽ വിവരമൊന്നുമില്ലെന്ന് റിപ്പോർട്ടുകൾ സൂചിപ്പിക്കുന്നു. അന്താരാഷ്ട്ര വിപണിയിൽ വലിയ ഡിമാൻഡുള്ള ഉൽപ്പന്നമായതിനാൽ വലിയ സാമ്പത്തിക നഷ്ടമാണ് കമ്പനിക്കുണ്ടായിരിക്കുന്നത്.സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്. യൂറോപ്പിലെ വിവിധ രാജ്യങ്ങളിലൂടെ കടന്നുപോകുന്ന ചരക്ക് നീക്കത്തിനിടെയുണ്ടായ ഈ വൻ മോഷണം സുരക്ഷാ ഏജൻസികളെയും ആശങ്കയിലാഴ്ത്തിയിട്ടുണ്ട്.
ട്രക്കിൽ കൊണ്ടുപോയ 12 ടൺ ചോക്ലേറ്റ് മോഷണം പോയി
