മലയാറ്റൂരില് രണ്ടു ദിവസം മുന്പ് കാണാതായ 19കാരിയെ വീടിനു ഒരു കിലോമീറ്റര് അകലെ ഒഴിഞ്ഞ പറമ്പില് മരിച്ച നിലയില് കണ്ടെത്തി.മലയാറ്റൂര് മുണ്ടങ്ങാമറ്റം തുരുത്തിപ്പറമ്പില് ഷൈജുവിന്റെയും ഷിനിയുടെയും മകള് ചിത്രപ്രിയ (19)യെയാണ് മരിച്ച നിലയില് കാണപ്പെട്ടത്.ആത്മഹത്യയാണോ കൊലപാതകമാണോ എന്ന് അന്വേഷണം നടന്നു വരികയാണ്.മൃതദേഹം ഇന്ക്വസ്റ്റ് നടപടികള്ക്കു ശേഷം പോസ്റ്റ്മോര്ട്ടത്തിനായി മാറ്റി.പോസ്റ്റ്മോര്ട്ടം റിപ്പോര്ട്ട് ലഭിച്ചാലേ മരണകാരണം വ്യക്തമാകൂ.
ബെംഗളരുവില് ഏവിയേഷന് ബിരുദ വിദ്യാര്ഥിയായ ചിത്രപ്രിയയെ ശനിയാഴ്ച മുതലാണ് കാണാതായത്.തുടര്ന്ന് കാലടി പൊലീസില് പരാതി നല്കിയിരുന്നു.അന്വേഷണത്തിനിടെയാണ് ഇന്ന് മലയാറ്റൂര് മണപ്പാട്ട് ചിറയ്ക്ക് സമീപത്തെ സെബിയൂര് റോഡിന് സമീപമുള്ള ആളൊഴിഞ്ഞ പറമ്പില് മൃതദേഹം കണ്ടെത്തിയത്.മൃതദേഹത്തിന് പഴക്കമുണ്ടെന്നാണ് പ്രാഥമിക നിഗമനം.മരണം സംബന്ധിച്ച് പെണ്കുട്ടിയുടെ മൊബൈല് ഫോണ് പരിശോധനയ്ക്ക് വിധേയമാക്കും.ആണ്സുഹൃത്തിനെയടക്കം ചോദ്യം ചെയ്തുവരികയാണെന്ന് പൊലീസ് വൃത്തങ്ങള് സൂചിപ്പിച്ചു.
