ഭോപ്പാൽ: മധ്യപ്രദേശിലെ ഉജ്ജയിനിൽ കുഴൽക്കിണറിൽ വീണ രണ്ടര വയസ്സുകാരൻ മരണത്തിന് കീഴടങ്ങി. 23 മണിക്കൂർ നീണ്ട തീവ്രമായ രക്ഷാപ്രവർത്തനത്തിനൊടുവിൽ കുട്ടിയെ പുറത്തെടുത്തുവെങ്കിലും ജീവൻ രക്ഷിക്കാനായില്ല. ഉജ്ജയിനിലെ ഝലാരിയ ഗ്രാമത്തിലെ ഭഗീരഥ് എന്ന ആൺകുട്ടിയാണ് ദാരുണമായി കൊല്ലപ്പെട്ടത്.
വ്യാഴാഴ്ച വൈകുന്നേരമാണ് വീടിന് സമീപം കളിച്ചുകൊണ്ടിരുന്ന ഭഗീരഥ് തുറന്നുവെച്ച കുഴൽക്കിണറിലേക്ക് വീണത്. ഏകദേശം 30 അടി താഴ്ചയിലാണ് കുട്ടി കുടുങ്ങിക്കിടന്നിരുന്നത്.ദേശീയ ദുരന്ത നിവാരണ സേന (NDRF), സംസ്ഥാന ദുരന്ത നിവാരണ സേന (SDRF), പോലീസ്, റവന്യൂ ഉദ്യോഗസ്ഥർ എന്നിവർ സംയുക്തമായാണ് രക്ഷാപ്രവർത്തനം നടത്തിയത്. കുട്ടിക്ക് ആവശ്യമായ ഓക്സിജൻ പൈപ്പ് വഴി നൽകിയിരുന്നു. കുഴൽക്കിണറിന് സമാന്തരമായി മറ്റൊരു വലിയ കുഴി എടുത്താണ് കുട്ടിയുടെ അടുത്തേക്ക് എത്താൻ ശ്രമിച്ചത്.
പാറ നിറഞ്ഞ പ്രദേശം ആയതിനാൽ മണ്ണുമാന്തി യന്ത്രങ്ങൾ ഉപയോഗിച്ച് കുഴിക്കുന്നത് ഏറെ പ്രയാസകരമായിരുന്നു. കാലാവസ്ഥാ വ്യതിയാനവും രക്ഷാപ്രവർത്തനത്തിന് തടസ്സം സൃഷ്ടിച്ചു.വെള്ളിയാഴ്ച ഉച്ചയോടെയാണ് കുട്ടിയെ പുറത്തെടുക്കാനായത്. ഉടൻതന്നെ ആശുപത്രിയിൽ എത്തിച്ചെങ്കിലും അതിനോടകം മരണം സംഭവിച്ചിരുന്നു.കുഴൽക്കിണറുകൾ സുരക്ഷിതമായി മൂടാത്തതാണ് ഇത്തരം അപകടങ്ങൾക്ക് കാരണമാകുന്നതെന്ന് അധികൃതർ ചൂണ്ടിക്കാട്ടി. സംഭവത്തിൽ അന്വേഷണം നടത്താനും വീഴ്ച വരുത്തിയവർക്കെതിരെ നടപടി സ്വീകരിക്കാനും പ്രാദേശിക ഭരണകൂടം ഉത്തരവിട്ടിട്ടുണ്ട്.
