കാൻബറ: ഒരു ദമ്പതികളെ നിരന്തരം പിന്തുടരുകയും നിരീക്ഷിക്കുകയും ചെയ്ത സംഭവത്തിൽ 39-കാരനെ കാൻബറ പോലീസ് അറസ്റ്റ് ചെയ്തു. കഴിഞ്ഞ മൂന്ന് മാസത്തിനിടെ നാല് തവണ ഇയാൾ ലൈനഹാമിലുള്ള ഇവരുടെ വീട്ടിലെത്തുകയും ഭയപ്പെടുത്തുന്ന രീതിയിൽ നിരീക്ഷണം നടത്തുകയും ചെയ്തതായാണ് പരാതി. ദമ്പതികൾക്ക് മുൻപരിചയമില്ലാത്ത വ്യക്തിയാണ് പ്രതി.
മരങ്ങൾ മുറിക്കുന്ന ആൾ എന്ന വ്യാജേനയും മറ്റും വീട്ടിലെത്തി തെറ്റായ വിവരങ്ങൾ അടങ്ങിയ കുറിപ്പുകൾ ഇയാൾ അവിടെ ഉപേക്ഷിച്ചിരുന്നു. ഇതിന് പുറമെ, ഭർത്താവിന്റെ ജോലിസ്ഥലത്തെ പാർക്കിംഗിൽ കാത്തുനിന്ന് അദ്ദേഹത്തെ നിരീക്ഷിച്ചതായും പോലീസ് കണ്ടെത്തി. ഞായറാഴ്ച രാവിലെ പത്തരയോടെ കുക്ക് എന്ന സ്ഥലത്തെ താമസസ്ഥലത്ത് നിന്നാണ് ഇയാളെ പോലീസ് പിടികൂടിയത്. പ്രതിക്കെതിരെ രണ്ട് കൗണ്ട് സ്റ്റാക്കിംഗ് കുറ്റങ്ങൾ ചുമത്തിയിട്ടുണ്ട്.
