എഡിറ്റോറിയൽ
ബോണ്ടായി ബീച്ചിൽ ഹനുക്ക ആഘോഷങ്ങൾക്കിടെയുണ്ടായ കൂട്ടക്കൊലപാതകം ഓസ്ട്രേലിയൻ മനസ്സാക്ഷിയെ നടുക്കിയിരിക്കുകയാണ്. എന്നാൽ, വെറുമൊരു ആക്രമണം എന്നതിലുപരി, ആഗോളതലത്തിൽ വളർന്നുവരുന്ന ഇസ്ലാമിക് സ്റ്റേറ്റ് (ISIS) ബന്ധിത തീവ്രവാദത്തിന്റെ വേരുകൾ ഓസ്ട്രേലിയയിലേക്കും പടരുന്നു എന്നതിന്റെ തെളിവായി ഈ സംഭവം മാറിക്കഴിഞ്ഞു. ഹനുക്ക ആഘോഷങ്ങളെ തന്നെ ലക്ഷ്യമിട്ടു എന്നത് ജൂത വിരുദ്ധതയുടെ (Antisemitism) ആഴം വ്യക്തമാക്കുന്നു.
വോട്ട് ബാങ്ക് രാഷ്ട്രീയം സുരക്ഷയെ തളർത്തുന്നുവോ എന്ന ചോദ്യം
ഈ സംഭവത്തോടെ ഓസ്ട്രേലിയൻ ഗവൺമെന്റിന്റെ കുടിയേറ്റ നയങ്ങൾ വലിയ തോതിലുള്ള രാഷ്ട്രീയ ചർച്ചകൾക്ക് വഴിവെച്ചിരിക്കുകയാണ്. സമുദായങ്ങൾക്കിടയിലെ വോട്ടബാങ്കുകൾ സംരക്ഷിക്കാനുള്ള ശ്രമത്തിനിടയിൽ, രാജ്യത്തിന്റെ ആഭ്യന്തര സുരക്ഷയിൽ വിട്ടുവീഴ്ച ചെയ്യപ്പെടുന്നുണ്ടോ എന്ന ചോദ്യം ശക്തമാണ്. തീവ്രചിന്താഗതിക്കാരെയും രാജ്യത്തിന്റെ മൂല്യങ്ങൾക്ക് വിരുദ്ധമായി പ്രവർത്തിക്കുന്നവരെയും തിരിച്ചറിയുന്നതിൽ നിലവിലെ സംവിധാനങ്ങൾ പരാജയപ്പെട്ടുവെന്നാണ് ഉയരുന്ന ആക്ഷേപം.
അപകടകരമായി വളരുന്ന റാഡിക്കലൈസേഷൻ
ഓസ്ട്രേലിയയ്ക്കുള്ളിൽ തന്നെ വളർന്നുവരുന്ന തീവ്രവാദ ചിന്താഗതികൾ (Homegrown Radicalization) ഒരു നിശബ്ദ ബോംബായി മാറുകയാണ്. ഓൺലൈൻ പ്ലാറ്റ്ഫോമുകൾ വഴി യുവാക്കളെ തീവ്രവാദത്തിലേക്ക് ആകർഷിക്കുന്ന രീതി വർദ്ധിക്കുന്നത് ഇന്റലിജൻസ് ഏജൻസികൾക്ക് വലിയ വെല്ലുവിളിയാണ്. ബോണ്ടി ആക്രമണം ആസൂത്രിതമായ ഒന്നായിരുന്നുവെന്നും, ഇതിന് പിന്നിൽ വിദേശ പരിശീലനം സിദ്ധിച്ച തീവ്രവാദി സംഘങ്ങളുടെ ഗൂഢാലോചനയുണ്ടെന്നുമുള്ള സൂചനകൾ പുറത്തുവരുന്നത് ആശങ്കയുടെ ആക്കം കൂട്ടുന്നു.
വിട്ടുവീഴ്ചയില്ലാത്ത നടപടികളുമായി സർക്കാർ
ദുരന്തത്തിന് പിന്നാലെ പ്രധാനമന്ത്രി ആന്റിണി ആൽബനീസ് പ്രഖ്യാപിച്ച വിപുലമായ ‘ഗൺ ബൈബാക്ക്’ (Gun Buyback) പദ്ധതിയും കർശനമായ തോക്ക് നിയന്ത്രണ നിയമങ്ങളും ഭരണകൂടത്തിന്റെ ഗൗരവത്തെയാണ് സൂചിപ്പിക്കുന്നത്.
- ഒരാൾക്ക് കൈവശം വെക്കാവുന്ന തോക്കുകളുടെ എണ്ണത്തിൽ നിയന്ത്രണം.
- ലൈസൻസ് പരിശോധനകളിൽ കൂടുതൽ കടുപ്പം.
- ദേശീയ തലത്തിൽ തോക്കുകൾ തിരിച്ചുവാങ്ങാനുള്ള വൻപദ്ധതി.
എന്നീ നടപടികളിലൂടെ 1996-ലെ പോർട്ട് ആർതർ കൂട്ടക്കൊലയ്ക്ക് ശേഷമുള്ള ഏറ്റവും വലിയ സുരക്ഷാ പരിഷ്കരണത്തിനാണ് രാജ്യം സാക്ഷ്യം വഹിക്കുന്നത്.
എന്നിരുന്നാലും ‘ദുർബലനായ പ്രധാനമന്ത്രി’ എന്ന വിമർശനം
സുരക്ഷാ വീഴ്ചയുടെ ഉത്തരവാദിത്തം ഏറ്റെടുത്ത് പ്രധാനമന്ത്രി ആന്റിണി ആൽബനീസ് രാജിവെക്കണമെന്ന ആവശ്യം കൊറോണർമാരടക്കമുള്ള ഉന്നത തലങ്ങളിൽ നിന്ന് ഉയരുന്നുണ്ട്. അക്രമികളെ മുൻകൂട്ടി നിരീക്ഷിക്കുന്നതിലും ജൂത വിദ്വേഷ പ്രസംഗങ്ങൾ തടയുന്നതിലും സർക്കാർ കാണിച്ച ഉദാസീനതയാണ് ഇത്തരം ഒരു വൻ ദുരന്തത്തിന് വഴിയൊരുക്കിയത്. ‘കർശനമായ നിയമങ്ങൾ’ എന്ന പ്രഖ്യാപനത്തിനപ്പുറം, ജനങ്ങളുടെ ജീവന് സുരക്ഷ ഉറപ്പാക്കുന്നതിൽ പരാജയപ്പെട്ട ഒരു ദുർബല നേതൃത്വമാണ് ഭരണത്തിലുള്ളതെന്ന വിമർശനം എങ്ങും ശക്തമാണ്. അത് ശരിവെക്കുന്ന പല കാഴ്ചകളും ഈ ഗൺമെന്റിന്റെ കാലത്തു കാണുകയും ചെയ്യുന്നു എന്നത് വെദനജെനകമാണ്.
മലയാളി സമൂഹത്തിന്റെ ആശങ്ക
സിഡ്നിയിലെ കുടിയേറ്റ സമൂഹത്തെ സംബന്ധിച്ചിടത്തോളം, ഓസ്ട്രേലിയയുടെ ബഹുസ്വരതയ്ക്കും സമാധാന അന്തരീക്ഷത്തിനും ഏൽക്കുന്ന ഓരോ മുറിവും ആശങ്കാജനകമാണ്. വംശീയമായ വിദ്വേഷങ്ങൾ പടരാതിരിക്കാനും സാമൂഹിക ഐക്യം നിലനിർത്താനും ഓരോ പൗരനും ബാധ്യസ്ഥരാണ്.
കുടിയേറ്റ നയങ്ങളിൽ വിട്ടുവീഴ്ചയില്ലാത്ത പരിശോധനയും, വോട്ടബാങ്ക് താൽപ്പര്യങ്ങൾ മറന്നുകൊണ്ടുള്ള കർശന നടപടികളും ഇപ്പോൾ അനിവാര്യമാണ്. ഓസ്ട്രേലിയയുടെ ബഹുസ്വരതയെ തകർക്കാൻ ശ്രമിക്കുന്ന ഏത് തരം റാഡിക്കലൈസേഷനും മുളയിലേ നുള്ളേണ്ടതുണ്ട്. രാജ്യം ആഗ്രഹിക്കുന്നത് പ്രസംഗങ്ങളല്ല, മറിച്ച് ശക്തമായ കർമ്മപദ്ധതികളാണ്
വിദ്വേഷ രാഷ്ട്രീയത്തിന് അടിപ്പെടാതെ, ഇരകൾക്ക് നീതി ഉറപ്പാക്കുകയും ഭാവിയിൽ ഇത്തരം ദുരന്തങ്ങൾ ആവർത്തിക്കാതിരിക്കാൻ ഭരണകൂടം കൂടുതൽ ജാഗ്രത കാണിക്കുകയും ചെയ്യേണ്ട സമയമാണിത്. നേതൃമാറ്റത്തേക്കാൾ ഉപരിയായി, നിലവിലെ സുരക്ഷാ പഴുതുകൾ അടയ്ക്കുന്നതിലാകണം മുൻഗണന.
കൂടുതൽ പൗര ബോധത്തോടും, സാമൂഹിക പ്രതിബത്തതയോടുകൂടി ഓരോരുത്തരും ഉയിർകൊള്ളുക.
ചീഫ് എഡിറ്റർ
ഡോ. ബാബു ഫിലിപ്പ് അഞ്ചാനാട്ട്
