ജനാധിപത്യത്തിന്റെ അന്തസ്സത്തയെ വെല്ലുവിളിച്ചുകൊണ്ട്, ഒരു ജനപ്രതിനിധിയെ അർദ്ധരാത്രിയിൽ അറസ്റ്റ് ചെയ്യുന്ന രീതി കേരളത്തിന് അപരിചിതമാണ്. പാലക്കാട്ട് എം.എൽ.എയുടെ അറസ്റ്റ് കേവലം ഒരു നിയമനടപടിയല്ല, മറിച്ച് രാഷ്ട്രീയ പകപോക്കലിന്റെയും അധികാരഗർവ്വിന്റെയും പ്രകടമായ അടയാളമാണ്. ഏതു കുറ്റവാളിയെയും നിയമത്തിന് മുന്നിൽ കൊണ്ടുവരാൻ പോലീസിന് അധികാരമുണ്ട്, എന്നാൽ ആ അധികാരം ഭരണകൂടത്തിന്റെ വിനീതവിധേയനായി രാഷ്ട്രീയ ശത്രുക്കളെ വേട്ടയാടാൻ ഉപയോഗിക്കുമ്പോൾ തകരുന്നത് ജനാധിപത്യം ഉയർത്തിപ്പിടിക്കുന്ന തുല്യനീതിയാണ്.
സ്ത്രീരക്ഷകനെന്ന മുഖംമൂടിയും യാഥാർത്ഥ്യവും
സ്ത്രീ സുരക്ഷയുടെ കാവൽക്കാരാണെന്ന് സ്വയം പ്രഖ്യാപിക്കുന്ന സർക്കാർ, യഥാർത്ഥത്തിൽ രാഷ്ട്രീയ താൽപ്പര്യങ്ങൾക്കായി ഈ വിഷയം ആയുധമാക്കുകയാണ്. ഇടത് മുന്നണിയിലെ പ്രമുഖ നേതാക്കൾക്കെതിരെ ഉയർന്ന ഗുരുതരമായ സ്ത്രീപീഡന പരാതികളിലും കുറ്റകൃത്യങ്ങളിലും സർക്കാർ പുലർത്തുന്ന മൗനാനുവാദം പൊതുസമൂഹം തിരിച്ചറിയുന്നുണ്ട്.
ഹേമ കമ്മിറ്റി റിപ്പോർട്ട്: നീതി തേടി അലഞ്ഞ ഒരു കൂട്ടം സ്ത്രീകളുടെ രോദനം വർഷങ്ങളോളം ഇരുമ്പുപെട്ടിയിലാക്കി പൂട്ടിവെച്ച ഈ സർക്കാർ ഏത് സ്ത്രീ സുരക്ഷയെക്കുറിച്ചാണ് സംസാരിക്കുന്നത്? റിപ്പോർട്ടിലെ ഞെട്ടിപ്പിക്കുന്ന വിവരങ്ങൾ പുറത്തുവരാതിരിക്കാൻ സർക്കാർ കാണിച്ച അമിതാവേശം ആരെ സംരക്ഷിക്കാനായിരുന്നു എന്നത് പകൽപോലെ വ്യക്തമാണ്.
ഇത്തരം ഇരട്ടത്താപ്പുക്കൾ ലഹരി കടത്ത് കേസിലും പീഡനക്കേസിലും പ്രതികളാകുന്ന സ്വന്തം അണികളെ ‘തള്ളിപ്പറയാതെ’ സംരക്ഷിക്കുകയും, രാഷ്ട്രീയ വിയോജിപ്പ് പ്രകടിപ്പിക്കുന്നവരെ നിയമത്തിന്റെ നൂലാമാലകളിൽ കുടുക്കി തകർക്കാൻ ശ്രമിക്കുകയും ചെയ്യുന്ന രീതി ഒരു പരിഷ്കൃത സമൂഹത്തിന് ചേർന്നതല്ല.
കോടതി ഇടപെടലുകൾ വഴി മാത്രം പുറത്തുവന്ന ആ വസ്തുതകൾ, അധികാരത്തിന്റെ തണലിലിരിക്കുന്ന ചിലരെ സംരക്ഷിക്കാനാണ് സർക്കാർ ശ്രമിച്ചതെന്ന് വ്യക്തമാക്കുന്നു. നീതി തേടി വരുന്ന സ്ത്രീകൾക്ക് മുന്നിൽ വാതിലുകൾ കൊട്ടിയടയ്ക്കുകയും, അതേസമയം രാഷ്ട്രീയ നേട്ടത്തിനായി സ്ത്രീവിഷയങ്ങളെ ഉപയോഗിക്കുകയും ചെയ്യുന്ന ഇരട്ടത്താപ്പാണ് ഇവിടെ പ്രകടമാകുന്നത്.
ജനാധിപത്യത്തിലെ ഇത്തരം കപട മുഖങ്ങൾ
വിവരസാങ്കേതികവിദ്യയുടെയും സോഷ്യൽ മീഡിയയുടെയും ഈ ആധുനിക യുഗത്തിലെ പൗരന്മാർ മുഖ വിലയ്ക്ക് എടുക്കില്ല എന്നറിയുന്നത് നന്ന്. വ്യാജ ആരോപണങ്ങൾ ഉന്നയിച്ചും ഭീതിയുടെ അന്തരീക്ഷം സൃഷ്ടിച്ചും ജനങ്ങളെ വിശ്വസിപ്പിക്കാമെന്നത് സർക്കാരിന്റെ വ്യാമോഹം മാത്രമാണ്. സമാധാനപൂർണ്ണമായ പ്രതിരോധങ്ങളെപ്പോലും ക്രിമിനൽ നടപടികളിലൂടെ അടിച്ചമർത്താൻ നോക്കുന്നത് തോൽവി ഭയക്കുന്ന ഭരണകൂടത്തിന്റെ ലക്ഷണമാണ്.
ഒരു കാര്യം വ്യക്തമാണ് നിയമം എല്ലാവർക്കും തുല്യമായിരിക്കണം. സ്വന്തം പാർട്ടിക്കാരന് സംരക്ഷണവും എതിരാളിക്ക് അർദ്ധരാത്രിയിലെ അറസ്റ്റും എന്നത് ഒരു ജനാധിപത്യ സർക്കാരിന് ഭൂഷണമല്ല. ഭരണഘടനാ സ്ഥാപനങ്ങളെയും പോലീസ് സംവിധാനത്തെയും രാഷ്ട്രീയ വേട്ടയാടലിനുള്ള പണിയായുധമാക്കുന്ന ഈ പ്രവണത തിരുത്തപ്പെടേണ്ടതാണ്.
ഇവിടെ ചോദ്യം ചെയ്യപ്പെടുന്നത് ഒരു വ്യക്തിയുടെ അറസ്റ്റല്ല, മറിച്ച് ഈ ഭരണകൂടം ഉയർത്തിപ്പിടിക്കുന്ന ‘നീതി’ എന്ന സങ്കൽപ്പത്തിന്റെ പൊള്ളത്തരമാണ്.
ജനകീയ കോടതിയിൽ ചോദ്യം ചെയ്യപ്പെടുന്ന ഈത്തരം കപടനാട്യങ്ങൾ വരുംകാലങ്ങളിൽ സർക്കാരിന് വലിയ തിരിച്ചടിയാകുമെന്നതിൽ തർക്കമില്ല.
കേവലം ആരോപണങ്ങളുടെ പേരിൽ അർദ്ധരാത്രിയിൽ വേട്ടയാടാനിറങ്ങുന്നവർ ഓർക്കേണ്ടത്, നീതി നടപ്പിലാക്കേണ്ടത് തെരുവുകളിലോ പോലീസ് മുറകളിലോ അല്ല, മറിച്ച് പരമോന്നതമായ കോടതിമുറികളിലാണെന്നാണ്. പരാതിക്കാരനും ആരോപണവിധേയർക്കും തുല്യമായ നീതി ലഭിക്കുമ്പോഴാണ് ഒരു സമൂഹം സാംസ്കാരികമായി ഔന്നത്യം പ്രാപിക്കുന്നത്.
ജനാധിപത്യം എന്നത് ആരോപണങ്ങൾ കൊണ്ട് ശത്രുക്കളെ ജയിലിലാക്കുന്ന സംവിധാനമല്ല. ആരോപണ വിധേയയോരാൾ കുറ്റവാളിയാകുന്നത് കോടതിയുടെ വിധിയിലൂടെ മാത്രമാണ്. പരാതിക്കാർക്കും, പ്രതിക്കും തുല്യമായ നീതി ഉറപ്പാക്കുമ്പോഴാണ് ഒരു ജനാധിപത്യം വിജയിക്കുന്നത്.
ദീർഘവീക്ഷണമുള്ള ഒരു ഭരണകൂടത്തിന് വേണ്ടത് പ്രതികാര ബുദ്ധിയല്ല, മറിച്ച് നിഷ്പക്ഷമായ നീതി നിർവ്വഹണമാണ്.
