ഐക്യുവിന്റെ ഏറ്റവും പുതിയ സ്മാർട്ട്ഫോണായ ‘ഐക്യു 15R’ ഉടൻ ഇന്ത്യൻ വിപണിയിലെത്തും. ചൈനയിൽ അടുത്തിടെ പുറത്തിറങ്ങിയ ഐക്യു ഇസഡ്11 ടർബോയുടെ റീബ്രാൻഡഡ് പതിപ്പായിരിക്കും ഇതെന്ന് സൂചന നൽകിക്കൊണ്ട് ഫോണിന്റെ ടീസർ കമ്പനി പുറത്തിറക്കി. കഴിഞ്ഞ വർഷം പുറത്തിറങ്ങിയ ഐക്യു 15-ന് ശേഷം ബ്രാൻഡ് ഇന്ത്യയിൽ അവതരിപ്പിക്കുന്ന പ്രധാന മോഡലാണിത്. മെറ്റൽ ഫ്രെയിമും പിൻഭാഗത്ത് ആകർഷകമായ ചെക്ക് പാറ്റേൺ ഡിസൈനുമാണ് ഫോണിന്റെ പ്രധാന പ്രത്യേകത.
ഫോട്ടോഗ്രഫിക്ക് ഏറെ പ്രാധാന്യം നൽകുന്ന ഈ ഫോണിൽ 200 മെഗാപിക്സലിന്റെ കരുത്തുറ്റ പ്രധാന ക്യാമറയാണ് പ്രതീക്ഷിക്കുന്നത്. ഇതിന് പുറമെ 8 എംപി അൾട്രാ വൈഡ് ലെൻസും സെൽഫികൾക്കായി 32 എംപി ഫ്രണ്ട് ക്യാമറയും ഉണ്ടാകും. ക്വാൽകോമിന്റെ ഏറ്റവും പുതിയ സ്നാപ്ഡ്രാഗൺ 8 ജെൻ 5 ചിപ്സെറ്റാണ് ഫോണിന് കരുത്ത് പകരുന്നത്. 1.5K റെസല്യൂഷനും 144Hz റിഫ്രഷ് റേറ്റുമുള്ള 6.59 ഇഞ്ച് അമോലെഡ് ഡിസ്പ്ലേ മികച്ച ഗെയിമിംഗ്, വീഡിയോ അനുഭവം ഉറപ്പുനൽകുന്നു.
ബാറ്ററി കരുത്തിന്റെ കാര്യത്തിലും ഐക്യു 15R മുന്നിലാണ്. 100 വാട്ട് ഫാസ്റ്റ് ചാർജിംഗ് പിന്തുണയുള്ള 7,600 mAh ബാറ്ററിയായിരിക്കും ഫോണിലുണ്ടാവുക. സുരക്ഷയ്ക്കായി പ്രീമിയം ഫോണുകളിൽ കാണുന്ന അൾട്രാസോണിക് ഫിംഗർപ്രിന്റ് സെൻസറും പൊടിയിൽ നിന്നും വെള്ളത്തിൽ നിന്നും സംരക്ഷണം നൽകുന്ന ഐപി68, ഐപി69 റേറ്റിംഗും ഈ സ്മാർട്ട്ഫോണിൽ ഉൾപ്പെടുത്തിയേക്കും. വരും ദിവസങ്ങളിൽ ഫോണിന്റെ വിലയും ലോഞ്ച് തീയതിയും കമ്പനി ഔദ്യോഗികമായി പ്രഖ്യാപിക്കും.
