മൗണ്ട് മൗംഗനൂയി (ന്യൂസിലന്ഡ്): നോര്ത്ത് ഐലന്ഡിലെ പ്രശസ്ത ടൂറിസ്റ്റ് കേന്ദ്രമായ മൗണ്ട് മൗംഗനൂയിയില് (മൗവോ) വന് ഉരുള്പൊട്ടല്. വ്യാഴാഴ്ച (2026 ജനുവരി 22) രാവിലെ 9:30-ഓടെ മൗവോ പര്വതനിരയുടെ താഴ്ഭാഗത്തുള്ള ‘ബീച്ച്സൈഡ് ഹോളിഡേ പാര്ക്ക്’ (Beachside Holiday Park) എന്ന ക്യാമ്പ് സൈറ്റിലേക്കാണ് മണ്ണും കല്ലും ഇടിഞ്ഞുവീണത്. കുട്ടികളടക്കം നിരവധി ആളുകളെ കാണാതായതായാണ് പ്രാഥമിക റിപ്പോര്ട്ടുകള്.
മുകളിലെ ചരിവില് നിന്ന് പെട്ടെന്നുണ്ടായ മണ്ണിടിച്ചില് ക്യാമ്പ് സൈറ്റിലുണ്ടായിരുന്ന ക്യാമ്പര് വാനുകളെയും കാറുകളെയും ടോയ്ലറ്റ് ബ്ലോക്കുകളെയും പൂര്ണ്ണമായും തകര്ത്തു.ഉരുള്പൊട്ടലിന്റെ സമയത്ത് അവധി ആഘോഷിക്കാനെത്തിയ നിരവധി കുടുംബങ്ങള് അവിടെ ഉണ്ടായിരുന്നു.രക്ഷാപ്രവര്ത്തകര് ആദ്യം എത്തിയപ്പോള് അവശിഷ്ടങ്ങള്ക്കിടയില് നിന്ന് ആളുകളുടെ നിലവിളി കേട്ടിരുന്നെങ്കിലും പിന്നീട് ശബ്ദമൊന്നും കേള്ക്കാനായില്ലെന്ന് അധികൃതര് അറിയിച്ചു.
പോലീസ്, ഫയര് ആന്ഡ് എമര്ജന്സി, ആംബുലന്സ് വിഭാഗങ്ങള് സംയുക്തമായി തിരച്ചില് തുടരുകയാണ്. പ്രത്യേക പരിശീലനം ലഭിച്ച നായ്ക്കളെയും യന്ത്രസാമഗ്രികളെയും പ്രദേശത്ത് വിന്യസിച്ചിട്ടുണ്ട്. എന്നാല്, നിലം ഇപ്പോഴും അസ്ഥിരമായി തുടരുന്നത് രക്ഷാപ്രവര്ത്തനത്തിന് വലിയ വെല്ലുവിളിയാണ് ഉയര്ത്തുന്നത്. പ്രദേശത്ത് വീണ്ടും മണ്ണിടിച്ചിലിന് സാധ്യതയുള്ളതിനാല് അതീവ ജാഗ്രത പാലിക്കാന് നിര്ദ്ദേശമുണ്ട്.
മൗണ്ട് മൗംഗനൂയിക്ക് പുറമെ വെല്ക്കം ബേ (Welcome Bay) എന്ന സ്ഥലത്തും ഉരുള്പൊട്ടല് റിപ്പോര്ട്ട് ചെയ്തിട്ടുണ്ട്.ഇവിടെ ഒരു വീട് തകരുകയും അതിലുണ്ടായിരുന്ന രണ്ട് പേരെ കാണാതാവുകയും ചെയ്തു.നോര്ത്ത് ഐലന്ഡിലുടനീളം ആയിരക്കണക്കിന് വീടുകളില് വൈദ്യുതി ബന്ധം നിലച്ചിരിക്കുകയാണ്.
ന്യൂസിലന്ഡിന്റെ ഭൂപ്രകൃതിയും കാലാവസ്ഥയും ഉരുള്പൊട്ടലിന് ഏറെ സാധ്യതയുള്ളതാണ്. പസഫിക് മേഖലയിലെ കനത്ത മഴ മണ്ണിടിച്ചിലിന് പ്രധാന കാരണമായത്.
കുത്തനെയുള്ള ചരിവുകളും ദുര്ബലമായ മണ്ണും അപകടസാധ്യത വര്ദ്ധിപ്പിക്കുന്നു.
ഇടയ്ക്കിടെയുണ്ടാകുന്ന ഭൂചലനങ്ങള് മലനിരകളെ ദുര്ബലമാക്കുന്നതും അപകടത്തിന് കാരണമാകുന്നു.
2023-ല് ഓക്ക്ലന്ഡിലുണ്ടായ പ്രളയത്തിന് സമാനമായ വെല്ലുവിളിയാണ് രാജ്യം ഇപ്പോള് നേരിടുന്നത്. നിലവിലെ സ്ഥിതിഗതികള് വിലയിരുത്താന് പ്രധാനമന്ത്രി ക്രിസ്റ്റഫര് ലക്സണ് അടിയന്തര നിര്ദ്ദേശം നല്കിയിട്ടുണ്ട്.ദുരന്തബാധിത മേഖലകളില് റെഡ് അലേര്ട്ട് തുടരുകയാണ്
