സിഡ്നി: സിഡ്നിയിലെ വോക്ലൂസ് ബീച്ചിലുണ്ടായ സ്രാവിന്റെ ആക്രമണത്തിൽ ഗുരുതരമായി പരിക്കേറ്റ് ചികിത്സയിലായിരുന്ന പന്ത്രണ്ട് വയസ്സുകാരൻ മരിച്ചു. സിഡ്നി സ്വദേശിയായ നിക്കോ ആന്റിക് ആണ് ശനിയാഴ്ച പുലർച്ചെ ആശുപത്രിയിൽ വെച്ച് മരണത്തിന് കീഴടങ്ങിയത്.
കഴിഞ്ഞ ആഴ്ച സുഹൃത്തുക്കൾക്കൊപ്പം ബീച്ചിൽ നീന്തുന്നതിനിടെയായിരുന്നു നിക്കോയെ സ്രാവ് ആക്രമിച്ചത്. കുട്ടിയുടെ കാലിന് ഗുരുതരമായി പരിക്കേറ്റിരുന്നു. സംഭവസ്ഥലത്തുണ്ടായിരുന്നവരും ഉടൻ എത്തിയ പാരാമെഡിക്കൽ സംഘവും ചേർന്ന് പ്രഥമശുശ്രൂഷ നൽകിയ ശേഷം സിഡ്നി ചിൽഡ്രൻസ് ഹോസ്പിറ്റലിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല.
സംഭവത്തെത്തുടർന്ന് വോക്ലൂസ് ഉൾപ്പെടെയുള്ള സിഡ്നിയിലെ കിഴക്കൻ തീരപ്രദേശങ്ങളിൽ അധികൃതർ കനത്ത ജാഗ്രതാ നിർദ്ദേശം നൽകി. അക്രമകാരിയായ സ്രാവിനെ കണ്ടെത്താൻ ഡ്രോണുകളും ഹെലികോപ്റ്ററുകളും ഉപയോഗിച്ച് നിരീക്ഷണം ശക്തമാക്കിയിട്ടുണ്ട്. വേനൽക്കാല അവധി ആഘോഷിക്കാൻ നിരവധി പേർ എത്തുന്ന സമയമായതിനാൽ ബീച്ചുകളിൽ കൂടുതൽ സുരക്ഷാ ഉദ്യോഗസ്ഥരെ വിന്യസിച്ചു.
നിക്കോയുടെ വിയോഗത്തിൽ അനുശോചനം രേഖപ്പെടുത്തിയ പ്രാദേശിക ഭരണകൂടം, കടലിൽ ഇറങ്ങുന്നവർ കർശനമായ സുരക്ഷാ മാനദണ്ഡങ്ങൾ പാലിക്കണമെന്ന് അഭ്യർത്ഥിച്ചു.
