സിഡ്നി: ചൈനീസ്‌ വിദേശമന്ത്രാലയ വക്‌താവ്‌ ഷാവോ ലിജാന്‍ ട്വീറ്റ്‌ ചെയ്‌ത ചിത്രത്തെച്ചൊല്ലി ചൈനയും ഓസ്‌ട്രേലിയയും തമ്മില്‍ വാക്‌പോര്‌ രൂക്ഷമാകുന്നു. ഒരു ഓസ്‌ട്രേലിയന്‍ സൈനികന്‍ അഫ്ഗാനിലെ ഒരു കുട്ടിയെ കൊല്ലുന്നതായ ചിത്രമാണ് ചൈന ലോകവ്യാപകമായി ട്വിറ്ററിലൂടെ പ്രചരിപ്പിച്ചത്. ചൈനയുടെ വിദേശകാര്യവകുപ്പ് തന്നെയാണ് ഔദ്യോഗിക ട്വിറ്റര്‍ പേജിലൂടെ വ്യാജ ചിത്രം പ്രചരിപ്പിച്ചത്. ചിത്രം വ്യാജമാണെന്നും അതു പിന്‍വലിച്ച്‌ ചൈനീസ്‌ ഉദ്യോഗസ്‌ഥന്‍ മാപ്പുപറയണമെന്നും ഓസ്‌ട്രലിയന്‍ പ്രധാനമന്ത്രി സ്‌കോട്ട്‌ മോറിസണ്‍ ആവശ്യപ്പെട്ടു. ചിത്രം നീക്കണമെന്ന്‌ ട്വിറ്ററിനോടും ഓസ്‌ട്രേലിയ ആവശ്യപ്പെട്ടു. എന്നാല്‍, മാപ്പു പറയില്ലെന്നും മനുഷ്യത്വഹീനമായ പെരുമാറ്റത്തിന്‌ ഓസ്‌ട്രേലിയയാണു മാപ്പു പറയേണ്ടതെന്നും ചൈനീസ്‌ അധികൃതര്‍ പറഞ്ഞു.
യുദ്ധസമയത്ത് നടന്ന വിഷയങ്ങളെ ഓസ്‌ട്രേലിയ അപലപിക്കുകയും തെറ്റ് ഏറ്റുപറയുകയും ചെയ്തിരുന്നു. ഓസ്ട്രേലിയക്കെതിരെ ചൈന നടത്തുന്നത് തികച്ചും തെറ്റായതും അപകീര്‍ത്തികരവുമായ പ്രചാരണമാണെന്നും മോറിസണ്‍ ആരോപിച്ചു. തങ്ങളുടെ സൈനികരെ അപമാനിച്ചുകൊണ്ട് വ്യാജ ചിത്രങ്ങളാണ് ചൈന ട്വിറ്ററില്‍ പ്രചരിപ്പിച്ചത്. ഇതിന് ഭരണകൂടം മാപ്പുപറയണമെന്നും ഓസ്‌ട്രേലിയന്‍ പ്രധാനമന്ത്രി പ്രസ്താവനയിലൂടെ പറഞ്ഞു. ഭരണകൂടത്തിന്റെതായ എല്ലാ അന്താരാഷ്ട്ര മര്യാദകളും ചൈന ലംഘിച്ചിരിക്കുകയാണെന്നും മോറിസണ്‍ പറഞ്ഞു.
മനുഷ്യാവകാശം, വ്യാപരനയം തുടങ്ങി വിവിധ വിഷയങ്ങളെച്ചൊല്ലി ഓസ്‌ട്രേലിയയും ചൈനയും തമ്മില്‍ തര്‍ക്കം നിലനില്‍ക്കുന്നതിടെയാണു പുതിയ വിവാദം.
