കൊച്ചി: 2024-25 ലയണിസ്റ്റിക് വർഷത്തിൽ രണ്ടായിരത്തിനടുത്ത് പുതിയ മെംബർമാരെ ചേർക്കുകയും 25 പുതിയ ക്ലബ്ബുകളുടെ രൂപീകരണം നടത്തുകയും ചെയ്ത ലയണ്സ് ഡിസ്ട്രിക്ട് 318ഡി ഗവർണർ ജയിംസ് വളപ്പിലയ്ക്ക് ഇന്റർനാഷണൽ പ്രസിഡന്റ് എ.പി. സിംഗ് മൾട്ടിപ്പിൾ ചാമ്പ്യൻഷിപ്പ് ട്രോഫി സമ്മാനിച്ചു.
സമസ്തമേഖലയിലും കാഴ്ചവച്ച സമാനതകളില്ലാത്ത പ്രവർത്തനങ്ങൾക്കുകൂടിയാണ് പുരസ്കാരം. മെമ്പർഷിപ്പിലും പുതിയ ക്ലബ്ബുകളിലും ലോകത്തിൽ നാലാം സ്ഥാനവും സേവനരംഗത്ത് ഒന്നാംസ്ഥാനവും നേടി. വയനാട് ചൂരൽമലയിൽ ലയണ്സ് ഹോസ്പിറ്റലിന്റെ നിർമാണത്തിനായി ലയണ്സ് ഇന്റർനാഷണൽ ഫൗണ്ടേഷനിലേക്കു രണ്ടു കോടി രൂപ സ്വരൂപിച്ചു.
എറണാകുളം ഗോകുലം കണ്വൻഷൻ സെന്ററിൽ നടന്ന മെഗാ ഇൻഡക്ഷൻ ചടങ്ങിലാണ് ആദരം നൽകിയത്. മൾട്ടിപ്പിൾ കൗണ്സിൽ ചെയർമാൻ രാജൻ നമ്പൂതിരി അധ്യക്ഷത വഹിച്ചു. ഈ വർഷം മെമ്പർഷിപ്പ് ചലഞ്ച്, ന്യൂ ക്ലബ് ചലഞ്ച്, എൽസിഐഎഫ് കോണ്ട്രിബ്യൂഷൻ തുടങ്ങിയവയിൽ മികവ് പുലർത്തിയ ഡിസ്ട്രിക്റ്റ് ഗവർണർമാരെയും ലയണ് ലീഡർമാരെയും ആദരിച്ചു.
പാസ്റ്റ് ഇന്റർനാഷണൽ ഡയറക്ടർമാരായ വി.പി. നന്ദകുമാർ, മുരുകൻ, വംശിധർ ബാബു, ഗ്ലോബൽ ആക്്ഷൻ ടീം ഏരിയ ലീഡർ അഡ്വ. വാമനകുമാർ, എൽസിഐഎഫ് ഗ്ലോബൽ കോ-ഓര്ഡിനേറ്റർ അമർനാഥ്, ഈ വർഷത്തെ ഡിസ്ട്രിക്ട് ഗവർണർമാരായ ജെയിൻ സി. ജോബ്, വിന്നി ഫിലിപ്പ്, ഷൈൻകുമാർ, ജയകൃഷ്ണൻ, അനിൽകുമാർ, രവി ഗുപ്ത എന്നിവർ ചടങ്ങിനു നേതൃത്വം നൽകി. ആയിരത്തോളം മെംബർമാർ പങ്കെടുത്തു.
