ലേ: ലഡാക്കിന്റെ തനത് സംസ്കാരവും വിശ്വാസങ്ങളും വിളിച്ചോതുന്ന രണ്ട് പ്രധാന ബുദ്ധമത ഉത്സവങ്ങൾക്ക് ഇന്ന് തുടക്കമായി. ലേ കൊട്ടാരത്തിൽ നടക്കുന്ന ‘ലേ ദോസ്മോച്ചെ’ ലികിർ മഠത്തിലെ ‘ലികിർ സ്ട്രോമോച്ചെ’ എന്നീ ഉത്സവങ്ങളാണ് അതിമനോഹരമായ ചടങ്ങുകളോടെ ആഘോഷിക്കുന്നത്. മേഖലയിലെ കഠിനമായ ശൈത്യകാലത്തിന് അവസാനമായെന്നും വരാനിരിക്കുന്ന കൃഷിക്കാലത്തിനായുള്ള ഒരുക്കങ്ങൾ തുടങ്ങിയെന്നുമാണ് ഈ ആഘോഷങ്ങൾ സൂചിപ്പിക്കുന്നത്.
തിന്മയുടെ മേൽ നന്മ നേടുന്ന വിജയത്തിന്റെ പ്രതീകമായാണ് ഈ ഉത്സവങ്ങൾ കണക്കാക്കപ്പെടുന്നത്. ബുദ്ധ സന്യാസിമാർ അവതരിപ്പിക്കുന്ന വിശുദ്ധമായ ‘തന്ത്രിക് മാസ്ക് ഡാൻസ്’ ആണ് ആഘോഷങ്ങളിലെ പ്രധാന ആകർഷണം. ലോകസമാധാനത്തിനും മികച്ച വിളവെടുപ്പിനും കൃത്യസമയത്തുള്ള മഞ്ഞുവീഴ്ചയ്ക്കുമായി രണ്ടാഴ്ച നീണ്ടുനിന്ന പ്രത്യേക പ്രാർത്ഥനകൾക്കും ചടങ്ങുകൾക്കും ശേഷമാണ് ഈ ആഘോഷങ്ങൾ നടക്കുന്നത്.
ലേ ദോസ്മോച്ചെ ഉത്സവത്തോടനുബന്ധിച്ച് തഖ്തോക് മഠത്തിലെ ലാമമാർ നിർമ്മിക്കുന്ന സങ്കീർണ്ണമായ ‘ത്രെഡ് ക്രോസുകൾ’ തിന്മയെ തുരത്താനായി കത്തിക്കുന്ന ചടങ്ങും ശ്രദ്ധേയമാണ്. പുതിയ കൃഷിക്കാലത്തെ പ്രതീക്ഷയോടെ വരവേൽക്കാൻ കർഷകരും പ്രാദേശിക ജനതയും ഒത്തുചേരുന്നതോടെ ലഡാക്ക് ഇപ്പോൾ ഉത്സവലഹരിയിലാണ്.
