മെൽബൺ: റീജിയണൽ വിക്ടോറിയയിലെ എച്ചുക്കയിലുള്ള വിക്ടോറിയ പാർക്കിൽ നിർമ്മാണ പ്രവർത്തനങ്ങൾക്കിടെ കണ്ടെത്തിയ മനുഷ്യ അവശിഷ്ടങ്ങൾ ചരിത്രപരമായ പ്രാധാന്യമുള്ളതാണെന്ന് പോലീസ് സ്ഥിരീകരിച്ചു. ഫെബ്രുവരി 13-നായിരുന്നു പാർക്കിൽ ജോലി ചെയ്തിരുന്ന തൊഴിലാളികൾ മണ്ണടിഞ്ഞു കിടന്നിരുന്ന അസ്ഥികൂടത്തിന്റെ ഭാഗങ്ങൾ കണ്ടെത്തിയത്.
തുടർന്ന് വിക്ടോറിയ പോലീസ് നടത്തിയ ശാസ്ത്രീയ പരിശോധനകൾക്കും ഫോറൻസിക് ടെസ്റ്റുകൾക്കും ശേഷമാണ് ഇവ പുരാതനമായ അവശിഷ്ടങ്ങളാണെന്ന നിഗമനത്തിൽ എത്തിയത്. “കണ്ടെത്തിയ അവശിഷ്ടങ്ങൾ ചരിത്രപരമായവയാണെന്ന് സ്ഥിരീകരിച്ചിട്ടുണ്ട്,” എന്ന് വിക്ടോറിയ പോലീസ് പ്രസ്താവനയിൽ അറിയിച്ചു. എന്നാൽ ഇവ എത്ര പഴക്കമുള്ളതാണെന്നോ ആരുടേതാണെന്നോ ഉള്ള കൂടുതൽ വിവരങ്ങൾ അധികൃതർ വെളിപ്പെടുത്തിയിട്ടില്ല.
കഴിഞ്ഞ ജനുവരിയിൽ ഫിലിപ്പ് ഐലൻഡിലെ ഒരു അവധിക്കാല വസതിയുടെ പിൻമുറ്റത്ത് പ്ലംബിംഗ് ജോലികൾക്കിടെ സമാനമായ രീതിയിൽ മനുഷ്യ അവശിഷ്ടങ്ങൾ കണ്ടെത്തിയിരുന്നു. മലിനജല പൈപ്പ് മാറ്റുന്നതിനായി കുഴിയെടുക്കുന്നതിനിടയിൽ ഉപരിതലത്തിൽ നിന്ന് 50 സെന്റീമീറ്റർ താഴെയായാണ് അന്ന് തൊഴിലാളികൾ അസ്ഥികൾ കണ്ടെത്തിയത്.
