കൊച്ചി: എറണാകുളം ജില്ലയിൽ പോലീസും എക്സൈസും ചേർന്ന് നടത്തിയ പരിശോധനയിൽ 30 കിലോ കഞ്ചാവ് പിടികൂടി. സംഭവവുമായി ബന്ധപ്പെട്ട് അഞ്ച് പേരെ പോലീസ് അറസ്റ്റ് ചെയ്തു. ലഹരിമരുന്ന് വിരുദ്ധ സ്ക്വാഡും പ്രാദേശിക പോലീസും സംയുക്തമായി നടത്തിയ നീക്കത്തിലാണ് പ്രതികൾ വലയിലായത്.
രഹസ്യവിവരത്തെത്തുടർന്ന് നടത്തിയ പരിശോധനയിലാണ് വൻതോതിൽ കഞ്ചാവ് കണ്ടെടുത്തത്. ആന്ധ്രപ്രദേശിൽ നിന്നും ഒഡീഷയിൽ നിന്നും എത്തിച്ച കഞ്ചാവാണിതെന്നാണ് പ്രാഥമിക നിഗമനം.പിടിക്കപ്പെട്ട അഞ്ച് പേരും ലഹരിമരുന്ന് വിതരണ ശൃംഖലയിലെ പ്രധാനികളാണെന്ന് പോലീസ് സംശയിക്കുന്നു. പ്രതികളെ ചോദ്യം ചെയ്തതിലൂടെ കൂടുതൽ പേരിലേക്ക് അന്വേഷണം വ്യാപിപ്പിക്കാനാണ് പോലീസിന്റെ തീരുമാനം.
ജില്ലയിലെ വിദ്യാലയങ്ങളും കോളേജുകളും കേന്ദ്രീകരിച്ച് ലഹരിമരുന്ന് വിതരണം ചെയ്യുന്ന സംഘമാണിതെന്ന് റിപ്പോർട്ടുകൾ സൂചിപ്പിക്കുന്നു. ചെറിയ പാക്കറ്റുകളിലാക്കി വിതരണത്തിന് തയ്യാറാക്കിയ നിലയിലായിരുന്നു കഞ്ചാവ്.ലഹരിമരുന്ന് എത്തിച്ചതിന്റെ ഉറവിടം കണ്ടെത്താനും ഇതിന് പിന്നിൽ പ്രവർത്തിക്കുന്ന സാമ്പത്തിക സ്രോതസ്സുകളെക്കുറിച്ച് അന്വേഷിക്കാനും പ്രത്യേക സംഘത്തെ നിയോഗിച്ചു.
