ന്യൂഡൽഹി: രാജ്യത്തെ വിവിധ സംസ്ഥാനങ്ങളിലായി ഒഴിവു വന്ന രാജ്യസഭാ സീറ്റുകളിലേക്ക് ഇന്ന് തിരഞ്ഞെടുപ്പ് നടക്കുന്നു. ആകെ 37 സീറ്റുകളിലേക്കാണ് തിരഞ്ഞെടുപ്പ് പ്രഖ്യാപിച്ചിരുന്നത് എങ്കിലും, ശരദ് പവാർ ഉൾപ്പെടെയുള്ള 26 സ്ഥാനാർത്ഥികൾ നേരത്തെ തന്നെ എതിരില്ലാതെ തിരഞ്ഞെടുക്കപ്പെട്ടുകഴിഞ്ഞു. ബാക്കിയുള്ള 11 സീറ്റുകളിലേക്കാണ് ഇന്ന് വോട്ടെടുപ്പ് നടക്കുന്നത്.ബിഹാർ (5 സീറ്റുകൾ), ഒഡീഷ (4 സീറ്റുകൾ), ഹരിയാന (2 സീറ്റുകൾ) എന്നീ സംസ്ഥാനങ്ങളിലാണ് ഇന്ന് കടുത്ത രാഷ്ട്രീയ പോരാട്ടം നടക്കുന്നത്.
ഭരണപക്ഷമായ എൻ.ഡി.എയും പ്രതിപക്ഷ സഖ്യമായ ‘ഇന്ത്യ’യും തമ്മിലുള്ള വാശിയേറിയ മത്സരത്തിനാണ് ഈ സംസ്ഥാനങ്ങൾ സാക്ഷ്യം വഹിക്കുന്നത്. അതുകൊണ്ടുതന്നെ, ഈ 11 സീറ്റുകളിലെ ഫലം രാഷ്ട്രീയമായി ഏറെ നിർണ്ണായകമാണ്. രാവിലെ ഒമ്പത് മണിക്ക് ആരംഭിച്ച പോളിംഗ് വൈകുന്നേരം നാല് മണി വരെ തുടരും.വൈകുന്നേരം അഞ്ച് മണിക്ക് വോട്ടെണ്ണൽ ആരംഭിക്കും.രാത്രിയോടെ തന്നെ ഔദ്യോഗിക ഫലങ്ങൾ പുറത്തുവരുമെന്ന് തിരഞ്ഞെടുപ്പ് കമ്മീഷൻ അറിയിച്ചു.രാജ്യസഭയുടെ ഘടനയിൽ നിർണ്ണായക സ്വാധീനം ചെലുത്തുന്ന തിരഞ്ഞെടുപ്പായതിനാൽ രാഷ്ട്രീയ കേന്ദ്രങ്ങൾ ആകാംക്ഷയോടെയാണ് ഫലത്തെ ഉറ്റുനോക്കുന്നത്.
