മെൽബൺ/സിഡ്നി: പശ്ചിമേഷ്യൻ സംഘർഷത്തെത്തുടർന്ന് ആഗോളതലത്തിൽ എണ്ണ വിതരണം തടസ്സപ്പെട്ടതോടെ ഓസ്ട്രേലിയയിൽ ഇന്ധനവില സർവ്വകാല റെക്കോർഡിലേക്ക്. പ്രതിസന്ധി രൂക്ഷമായ സാഹചര്യത്തിൽ ഇന്ധന ഉപഭോഗം കുറയ്ക്കുന്നതിനായി ഓസ്ട്രേലിയക്കാർ പരമാവധി വീട്ടിലിരുന്ന് ജോലി ചെയ്യണമെന്ന് അന്താരാഷ്ട്ര ഊർജ്ജ ഏജൻസി (IEA) നിർദ്ദേശിച്ചു. രാജ്യത്ത് ഡീസൽ വില ലിറ്ററിന് 3 ഡോളർ എന്ന റെക്കോർഡ് നിരക്കിലെത്തിയ പശ്ചാത്തലത്തിലാണ് ഈ മുന്നറിയിപ്പ്.
ഇന്ധനം ലാഭിക്കുന്നതിനായി പത്ത് നിർദ്ദേശങ്ങളാണ് ഏജൻസി മുന്നോട്ടുവെച്ചിരിക്കുന്നത്. റോഡുകളിൽ വാഹനങ്ങളുടെ വേഗത കുറയ്ക്കുക, വിമാനയാത്രകൾ ഒഴിവാക്കുക, കാർപൂളിംഗ് രീതി അവലംബിക്കുക, പൊതുഗതാഗതം പരമാവധി ഉപയോഗപ്പെടുത്തുക തുടങ്ങിയവ ഇതിൽ ഉൾപ്പെടുന്നു. നിലവിൽ മെൽബണിലെ ഹോത്തോണിൽ പെട്രോളിന് ലിറ്ററിന് 2.99 ഡോളറാണ് വില. മെൽബണിന്റെ വടക്കൻ മേഖലയായ കിംഗ്സ്ബറിയിലെ ചില സ്റ്റേഷനുകളിൽ ഇത് 3.10 ഡോളർ വരെ ഉയർന്നിട്ടുണ്ട്. സിഡ്നിയിലെ ലൂയിഷാമിൽ 2.79 ഡോളറാണ് വില. അതേസമയം പെർത്തിലാണ് രാജ്യത്തെ ഏറ്റവും കുറഞ്ഞ നിരക്ക് (2.19 ഡോളർ) രേഖപ്പെടുത്തിയിരിക്കുന്നത്.
രാജ്യത്തെ ശരാശരി ഇന്ധനവില നിലവിൽ 2.45 ഡോളറാണ്. ഏപ്രിൽ അവസാനത്തോടെ നിലവിലെ സ്റ്റോക്ക് തീരാൻ സാധ്യതയുള്ളതിനാൽ സ്ഥിതിഗതികൾ തുടർന്നാൽ പുതിയ നിയന്ത്രണങ്ങൾ ഏർപ്പെടുത്തേണ്ടി വരുമെന്ന് എമർജൻസി മാനേജ്മെന്റ് മന്ത്രി ക്രിസ്റ്റി മക്ബെയ്ൻ സൂചിപ്പിച്ചു. എന്നാൽ ഇന്ധന റേഷൻ ഏർപ്പെടുത്തുമെന്ന വാർത്തകൾ പ്രധാനമന്ത്രി ആന്തണി ആൽബനീസ് തള്ളി. രാജ്യത്ത് ഇന്ധന വിതരണത്തിൽ കുറവില്ലെന്നും എന്നാൽ വിതരണ ശൃംഖലയിൽ ചില തടസ്സങ്ങൾ നേരിടുന്നുണ്ടെന്നും അദ്ദേഹം പറഞ്ഞു. ഇന്ധനം പൂഴ്ത്തിവെക്കരുതെന്ന് അദ്ദേഹം ജനങ്ങളോട് അഭ്യർത്ഥിച്ചു. അതേസമയം, ഇന്ധന ശേഖരത്തെക്കുറിച്ചും ഭാവി പദ്ധതികളെക്കുറിച്ചും സർക്കാർ കൂടുതൽ സുതാര്യത കാണിക്കണമെന്ന് പ്രതിപക്ഷം ആവശ്യപ്പെട്ടു
