മെൽബൺ: കാട്ടുതീ തകർത്തെറിഞ്ഞ വിക്ടോറിയൻ ഗ്രാമങ്ങളിൽ അതിജീവനത്തിനായി പൊരുതുന്ന കർഷകരെ ലക്ഷ്യമിട്ട് ഇന്ധനക്കൊള്ള. റഫിയിലെ (Ruffy) ആട് വളർത്തൽ കേന്ദ്രത്തിൽ നിന്ന് നൂറുകണക്കിന് ലിറ്റർ ഇന്ധനമാണ് കഴിഞ്ഞ ദിവസം രാത്രി മോഷ്ടാക്കൾ ഊറ്റിയെടുത്തത്. ജനുവരിയിലെ ഭീകരമായ ലോംഗ്വുഡ് കാട്ടുതീയിൽ 1850-ഓളം ആടുകൾ ചാവുകയും ആയിരത്തോളം ഏക്കർ കൃഷിയിടം കത്തിനശിക്കുകയും ചെയ്ത സാറ തോംസണിന്റെയും റോസിന്റെയും ഫാമിലാണ് ഈ ക്രൂരമായ മോഷണം നടന്നത്.
കൃഷി ആവശ്യങ്ങൾക്കായി സൂക്ഷിച്ചിരുന്ന 400 ലിറ്റർ ഡീസലും 100 ലിറ്റർ പെട്രോളുമാണ് ടാങ്കുകളിൽ നിന്ന് മോഷ്ടാക്കൾ കവർന്നത്. കാട്ടുതീയിൽ നശിച്ച 18 കിലോമീറ്ററോളം വരുന്ന വേലികൾ പുനർനിർമ്മിക്കാനുള്ള ശ്രമത്തിലായിരുന്നു ഈ കർഷക ദമ്പതികൾ. “തീപിടുത്തത്തിന് ശേഷം എല്ലാം പൂജ്യത്തിൽ നിന്ന് തുടങ്ങാൻ ശ്രമിക്കുമ്പോഴാണ് ഈ ചതി. ഞങ്ങളുടെ ഇന്ധനം മാത്രമല്ല, ഈ ഫാം പുനർനിർമ്മിക്കാനുള്ള ഞങ്ങളുടെ കഴിവിനെയാണ് അവർ മോഷ്ടിച്ചിരിക്കുന്നത്,” സാറ തോംസൺ പറഞ്ഞു. മേഖലയിൽ ഇന്ധന മോഷണം വർദ്ധിക്കുന്നതായി പോലീസ് മുന്നറിയിപ്പ് നൽകിയിട്ടുണ്ട്.
ഇന്ധനക്ഷാമവും കുതിച്ചുയരുന്ന വിലയും പ്രാദേശിക വിപണിയെയും സാരമായി ബാധിച്ചിരിക്കുകയാണ്. യൂറോവയിലെ ബിസിനസുകാർക്ക് ഇന്ധന സർചാർജായി 25 ശതമാനം വരെ അധികം നൽകേണ്ടി വരുന്നത് ചരക്ക് നീക്കത്തെയും ബാധിച്ചു. മെൽബണിലെ ഡിപ്പോകളിൽ നിന്ന് ഇന്ധനം ലഭിക്കാത്തതിനെത്തുടർന്ന് സിഡ്നിയിൽ നിന്ന് ഇന്ധനം എത്തിക്കേണ്ടി വരുന്നത് ഭീമമായ ചിലവാണ് വരുത്തിവെക്കുന്നത്. ഇന്ധന നികുതി അടിയന്തരമായി വെട്ടിക്കുറയ്ക്കണമെന്ന് പ്രാദേശിക എം.പി ആനാബെല്ലെ ക്ലീലാൻഡ് സർക്കാരിനോട് ആവശ്യപ്പെട്ടു. ഇന്ധന പ്രതിസന്ധി തുടർന്നാൽ മെൽബണിലെ സൂപ്പർമാർക്കറ്റുകളിൽ നിത്യോപയോഗ സാധനങ്ങൾക്ക് വൻ വിലക്കയറ്റം ഉണ്ടാകുമെന്നും അവർ മുന്നറിയിപ്പ് നൽകി.
