ബ്രിസ്ബേൻ: ഓസ്ട്രേലിയ നേരിടുന്ന കടുത്ത ഇന്ധനക്ഷാമത്തിന് പരിഹാരമായി സിംഗപ്പൂരിനോളം വലിപ്പമുള്ള ഭീമൻ എണ്ണശേഖരം (Oil Lake) വേഗത്തിൽ തുറന്നുനൽകാൻ ക്വീൻസ്ലൻഡ് സർക്കാർ ഒരുങ്ങുന്നു. ബ്രിസ്ബേന് 300 കിലോമീറ്റർ പടിഞ്ഞാറ് സ്ഥിതി ചെയ്യുന്ന ‘തറൂം ട്രഫ്’ (Taroom Trough) എന്നറിയപ്പെടുന്ന ഈ എണ്ണശേഖരത്തിൽ പര്യവേഷണം നടത്തുന്നതിന് പ്രമുഖ കമ്പനികൾക്ക് സർക്കാർ ഇതിനോടകം അനുമതി നൽകിക്കഴിഞ്ഞു.
നിലവിലെ ഇന്ധന പ്രതിസന്ധിക്ക് ഇത് പെട്ടെന്നുള്ള ഒരു പരിഹാരമല്ലെങ്കിലും, പര്യവേഷണ ഫലങ്ങൾ അനുകൂലമാണെങ്കിൽ 2028-ഓടെ ഇവിടെ നിന്നും എണ്ണ ഖനനം ആരംഭിക്കാൻ സാധിക്കുമെന്നാണ് വിലയിരുത്തപ്പെടുന്നത്. ഈ എണ്ണശേഖരം ഖനനത്തിന് എത്രത്തോളം അനുയോജ്യമാണെന്ന് 2026 അവസാനത്തോടെ സർക്കാരിന് വ്യക്തമാകും.
ക്വീൻസ്ലൻഡിൽ മാത്രം ഇന്നലെ നൂറിലധികം സർവീസ് സ്റ്റേഷനുകളിൽ ഇന്ധനം തീർന്നതായാണ് റിപ്പോർട്ട്. രാജ്യമെമ്പാടും സമാനമായ സാഹചര്യം നിലനിൽക്കുന്ന പശ്ചാത്തലത്തിൽ, കൃഷി, ട്രക്കിംഗ്, അടിയന്തര സേവനങ്ങൾ തുടങ്ങിയ അവശ്യ മേഖലകൾക്ക് ഇന്ധന ലഭ്യത ഉറപ്പാക്കുന്നതിനായുള്ള ‘ദേശീയ അടിയന്തര ഇന്ധന പദ്ധതി’ (National Emergency Fuel Plan) ഫെഡറൽ സർക്കാർ ഉടൻ പ്രഖ്യാപിക്കാനിരിക്കെയാണ് ഈ നിർണ്ണായക നീക്കം.
അതേസമയം, ഇന്ധനവില കുറയ്ക്കുന്നതിനായി ഇന്ധന എക്സൈസ് നികുതി (Fuel Excise) വെട്ടിക്കുറയ്ക്കണമെന്ന് പ്രതിപക്ഷം ആവശ്യപ്പെട്ടു. നിലവിൽ ഓരോ ലിറ്റർ ഇന്ധനത്തിനും 52 സെന്റ് നികുതിയായി ഈടാക്കുന്നുണ്ടെന്നും ഇത് മൂന്ന് മാസത്തേക്ക് പകുതിയായി കുറയ്ക്കണമെന്നും ഷാഡോ വിദേശകാര്യ മന്ത്രി ടെഡ് ഒബ്രിയൻ പറഞ്ഞു. നികുതി കുറയ്ക്കുന്നത് ഫെഡറൽ ബജറ്റിനെ ബാധിക്കുമെങ്കിലും, നിലവിലെ ഇന്ധന പ്രതിസന്ധി രാജ്യത്തിന്റെ സാമ്പത്തിക വ്യവസ്ഥയെ മൊത്തത്തിൽ ബാധിക്കുമെന്ന ആശങ്കയും ഉയരുന്നുണ്ട്.
