ടെഹ്റാൻ: അമേരിക്കയുമായുള്ള രൂക്ഷമായ സൈനിക സംഘർഷങ്ങൾക്കിടെ രണ്ടാഴ്ചത്തെ വെടിനിർത്തൽ കരാർ അംഗീകരിക്കുന്നതായി ഇറാൻ പ്രഖ്യാപിച്ചു. അന്താരാഷ്ട്ര തലത്തിൽ നടന്ന നയതന്ത്ര ചർച്ചകൾക്കൊടുവിലാണ് യുദ്ധത്തിന് താത്കാലിക വിരാമമിടാൻ ഇറാൻ സമ്മതിച്ചത്. ഇതോടെ ലോകത്തെ പ്രധാന എണ്ണക്കടത്തു പാതകളിലൊന്നായ ഹോർമൂസ് കടലിടുക്ക് തുറന്നുകൊടുക്കാനും ഇറാൻ തീരുമാനിച്ചു.പാകിസ്ഥാൻ ഉൾപ്പെടെയുള്ള രാജ്യങ്ങൾ മുന്നോട്ടുവെച്ച സമാധാന നിർദ്ദേശങ്ങൾ പരിഗണിച്ചാണ് ഇറാന്റെ ഈ നീക്കം. രണ്ടാഴ്ചത്തെ ഈ കാലയളവിൽ മേഖലയിൽ സമാധാനം പുനഃസ്ഥാപിക്കാനും കൂടുതൽ ചർച്ചകൾ നടത്താനും സാധിക്കുമെന്ന് ഇറാൻ പ്രത്യാശ പ്രകടിപ്പിച്ചു. വെടിനിർത്തൽ പ്രഖ്യാപിച്ചതോടെ തടഞ്ഞുവെച്ചിരിക്കുന്ന കപ്പലുകൾക്ക് ഹോർമൂസ് കടലിടുക്കിലൂടെ യാത്ര തുടരാനാകും.നേരത്തെ, ഇറാന്റെ ഊർജ്ജ നിലയങ്ങൾ ലക്ഷ്യമിട്ടുള്ള ആക്രമണങ്ങൾ രണ്ടാഴ്ചത്തേക്ക് നിർത്തിവെക്കാൻ അമേരിക്കൻ പ്രസിഡന്റ് ഡോണൾഡ് ട്രംപ് ഉത്തരവിട്ടിരുന്നു. ഇതിന് പിന്നാലെയാണ് ഇറാന്റെ ഭാഗത്തുനിന്നും അനുകൂലമായ നിലപാടുണ്ടായിരിക്കുന്നത്. വെടിനിർത്തൽ കരാർ നിലവിൽ വന്നതോടെ ആഗോള വിപണിയിൽ എണ്ണവിലയിൽ ഗണ്യമായ കുറവുണ്ടാകുമെന്നാണ് സാമ്പത്തിക വിദഗ്ധർ വിലയിരുത്തുന്നത്.എങ്കിലും, ഇതൊരു താത്കാലികമായ തീരുമാനമാണെന്നും സ്ഥിരമായ സമാധാന കരാറിലെത്താൻ ഇനിയും കടമ്പകൾ ഏറെയുണ്ടെന്നും ഇറാൻ വ്യക്തമാക്കിയിട്ടുണ്ട്. അമേരിക്കയുടെ ഭാഗത്തുനിന്നുള്ള തുടർന്നുള്ള നീക്കങ്ങൾ നിരീക്ഷിച്ച ശേഷമായിരിക്കും ഇറാൻ അന്തിമ തീരുമാനമെടുക്കുക.
യുദ്ധത്തിന് താത്കാലിക വിരാമം: രണ്ടാഴ്ചത്തെ വെടിനിർത്തൽ അംഗീകരിച്ച് ഇറാൻ; ഹോർമൂസ് കടലിടുക്ക് തുറക്കും
