കൊല്ലം: ശബരിമലയിലെ സ്വർണക്കൊള്ളയുമായി ബന്ധപ്പെട്ട കേസിൽ തിരുവിതാംകൂർ ദേവസ്വം ബോർഡ് മുൻ അംഗവും സി.പി.ഐ നേതാവുമായ കെ.പി. ശങ്കരദാസിന് ജാമ്യം അനുവദിച്ചു. കൊല്ലം വിജിലൻസ് കോടതിയാണ് അദ്ദേഹത്തിന് സ്വാഭാവിക ജാമ്യം (Statutory Bail) അനുവദിച്ചത്.
2026 ജനുവരി 14-നാണ് ഇദ്ദേഹത്തെ പ്രത്യേക അന്വേഷണ സംഘം അറസ്റ്റ് ചെയ്തത്. തിരുവനന്തപുരത്തെ സ്വകാര്യ ആശുപത്രിയിൽ ചികിത്സയിൽ കഴിയവേയായിരുന്നു അറസ്റ്റ്.ആരോഗ്യപ്രശ്നങ്ങൾ ചൂണ്ടിക്കാട്ടി മുൻപ് പലതവണ ജാമ്യത്തിനായി കോടതിയെ സമീപിച്ചിരുന്നെങ്കിലും ഗൗരവകരമായ കുറ്റാരോപണങ്ങൾ പരിഗണിച്ച് കോടതി അവയെല്ലാം തള്ളുകയായിരുന്നു.
ശബരിമലയിലെ സോപാനത്തിൽ സ്വർണം പൊതിയുന്നതുമായി ബന്ധപ്പെട്ട ‘കട്ടിളപ്പാളി കേസ്’, ‘ദ്വാരപാലക ശില്പ കേസ്’ എന്നിവയിലാണ് ശങ്കരദാസ് പ്രതിയായിരിക്കുന്നത്.അന്വേഷണ സംഘം കുറ്റപത്രം സമർപ്പിക്കാൻ വൈകുന്നത് കേസിലെ പ്രതികൾക്ക് നിയമപരമായ ഈ ആനുകൂല്യം ലഭിക്കാൻ കാരണമായെന്നാണ് റിപ്പോർട്ടുകൾ സൂചിപ്പിക്കുന്നത്.
