ഓസ്ലോ: നോർവേ തലസ്ഥാനമായ ഓസ്ലോയിൽ നടക്കുന്ന മൂന്നാമത് ഇന്ത്യ-നോർഡിക് ഉച്ചകോടിക്കിടെ പ്രധാനമന്ത്രി നരേന്ദ്ര മോദിയും ഡെൻമാർക്ക് പ്രധാനമന്ത്രി മെറ്റ് ഫ്രെഡറിക്സണും തമ്മിൽ ഉഭയകക്ഷി കൂടിക്കാഴ്ച നടത്തി. ഇരുരാജ്യങ്ങളും തമ്മിലുള്ള ഹരിത തന്ത്രപ്രധാന പങ്കാളിത്തത്തിന്റെ (Green Strategic Partnership) പുരോഗതി വിലയിരുത്തിയ നേതാക്കൾ, പരിസ്ഥിതി, കാലാവസ്ഥാ വ്യതിയാനം, ഹരിത ഊർജ്ജ പരിവർത്തനം എന്നീ മേഖലകളിലെ സഹകരണം കൂടുതൽ ശക്തമാക്കാൻ ധാരണയിലെത്തി.
പ്രതിരോധം, ആർട്ടിഫിഷ്യൽ ഇന്റലിജൻസ് (AI), പുത്തൻ സാങ്കേതികവിദ്യകൾ, സ്റ്റാർട്ടപ്പുകൾ, അക്കാദമിക കൈമാറ്റങ്ങൾ എന്നിവയുൾപ്പെടെയുള്ള മേഖലകളിലെ ഉഭയകക്ഷി സഹകരണം വിപുലീകരിക്കുന്നതിനെക്കുറിച്ച് ഇരുനേതാക്കളും വിശദമായ ചർച്ചകൾ നടത്തി. അതിവേഗം വളരുന്ന ഇന്ത്യൻ സമ്പദ്വ്യവസ്ഥയിലേക്ക് ഡാനിഷ് ഹരിത സാങ്കേതികവിദ്യകളെയും നിക്ഷേപങ്ങളെയും പ്രധാനമന്ത്രി നരേന്ദ്ര മോദി സ്വാഗതം ചെയ്തു. ഗുജറാത്തിലെ ഗിഫ്റ്റ് സിറ്റിയിൽ (GIFT City) സാന്നിധ്യമറിയിക്കാൻ ഡാനിഷ് കമ്പനികളെ അദ്ദേഹം ക്ഷണിക്കുകയും ചെയ്തു.
വാരാണസിയിൽ കേന്ദ്ര സർക്കാരും ഐഐടി ബനാറസ് ഹിന്ദു സർവകലാശാലയും ഡെൻമാർക്ക് സർക്കാരും സംയുക്തമായി സ്ഥാപിച്ച ‘സ്മാർട്ട് ലബോറട്ടറി ഓൺ ക്ലീൻ റിവേഴ്സ്’ (SLCR) പദ്ധതിയുടെ വിജയകരമായ പ്രവർത്തനത്തെ നേതാക്കൾ പ്രത്യേകം പ്രശംസിച്ചു. പ്രാദേശികവും അന്തർദേശീയവുമായ പൊതുതാത്പര്യമുള്ള വിവിധ വിഷയങ്ങളും ഐക്യരാഷ്ട്രസഭാ സുരക്ഷാ കൗൺസിലിലെ ഡെൻമാർക്കിന്റെ അംഗത്വവും കൂടിക്കാഴ്ചയിൽ ചർച്ചയായി. സന്ദർശനത്തിന്റെ ഭാഗമായി ഐസ്ലൻഡ്, ഫിൻലൻഡ് എന്നീ രാജ്യങ്ങളിലെ പ്രധാനമന്ത്രിമാരുമായും നരേന്ദ്ര മോദി ഉഭയകക്ഷി ചർച്ചകൾ നടത്തിയിരുന്നു.
