ആലപ്പുഴ: നവകേരള സദസിനിടെ ആലപ്പുഴയിൽ വെച്ച് യൂത്ത് കോൺഗ്രസ്-കെഎസ്യു പ്രവർത്തകരെ മുൻ മുഖ്യമന്ത്രി പിണറായി വിജയന്റെ ഗൺമാനും സുരക്ഷാ ഉദ്യോഗസ്ഥരും ചേർന്ന് മർദിച്ച സംഭവത്തിൽ പുനരന്വേഷണത്തിനായി പ്രത്യേക അന്വേഷണ സംഘത്തെ (SIT) നിയോഗിച്ചു. അധികാരമേറ്റതിന് പിന്നാലെ മുഖ്യമന്ത്രി വി.ഡി. സതീശന്റെ നേതൃത്വത്തിൽ ചേർന്ന ആദ്യ മന്ത്രിസഭാ യോഗത്തിലാണ് ഈ നിർണായക തീരുമാനം. മുൻ എൽഡിഎഫ് സർക്കാരിന്റെ കാലത്ത് കരിങ്കൊടി കാണിച്ച പ്രതിഷേധക്കാരെ ക്രൂരമായി തല്ലിച്ചതച്ച സംഭവത്തിൽ കൃത്യമായ അന്വേഷണം നടന്നിട്ടില്ലെന്ന വിലയിരുത്തലിനെ തുടർന്നാണ് ആഭ്യന്തര വകുപ്പിന്റെ പുതിയ നീക്കം.
2023 ഡിസംബർ 15-ന് ആലപ്പുഴ ജനറൽ ആശുപത്രി ജംഗ്ഷനിൽ വെച്ചായിരുന്നു കേസിനാസ്പദമായ സംഭവം നടന്നത്. മുഖ്യമന്ത്രിയുടെ വാഹനവ്യൂഹത്തിന് നേരെ കരിങ്കൊടി കാണിച്ച കെഎസ്യു ജില്ലാ പ്രസിഡന്റ് എ.ഡി. തോമസ്, യൂത്ത് കോൺഗ്രസ് സംസ്ഥാന ഭാരവാഹി അജയ് ജുവൽ കുര്യാക്കോസ് എന്നിവരെ പ്രാദേശിക പോലീസ് കസ്റ്റഡിയിലെടുത്തതിന് പിന്നാലെ, അകമ്പടി വാഹനത്തിൽ നിന്നിറങ്ങിയ ഗൺമാൻ അനിൽ കുമാറും സുരക്ഷാ ജീവനക്കാരൻ സന്ദീപും ചേർന്ന് ലാത്തികൊണ്ട് ക്രൂരമായി മർദിക്കുകയായിരുന്നു. മർദനത്തിൽ എ.ഡി. തോമസിന് തലയ്ക്കും അജയ്ക്ക് കെയ്ക്കും ഗുരുതരമായി പരുക്കേറ്റിരുന്നു.
സംഭവം വൻ രാഷ്ട്രീയ വിവാദങ്ങൾക്ക് വഴിവെച്ചിരുന്നെങ്കിലും അന്ന് മുഖ്യമന്ത്രിയായിരുന്ന പിണറായി വിജയൻ സുരക്ഷാ ഉദ്യോഗസ്ഥരുടെ നടപടിയെ ‘രക്ഷാപ്രവർത്തനം’ എന്ന് വിശേഷിപ്പിച്ച് ന്യായീകരിക്കുകയാണ് ചെയ്തത്. പ്രാദേശിക പോലീസും ക്രൈംബ്രാഞ്ചും കേസ് അട്ടിമറിക്കാൻ ശ്രമിച്ചതായും ഉദ്യോഗസ്ഥർക്ക് സംരക്ഷണം നൽകിയതായും ആക്ഷേപമുയർന്നിരുന്നു. മർദനമേറ്റ എ.ഡി. തോമസ് നിലവിൽ ആലപ്പുഴയിൽ നിന്നുള്ള യുഡിഎഫ് എംഎൽഎയാണ്. കേസിൽ പുനരന്വേഷണം പ്രഖ്യാപിച്ച സർക്കാർ തീരുമാനത്തെ സ്വാഗതം ചെയ്യുന്നതായും ജനാധിപത്യപരമായ പ്രതിഷേധങ്ങളെ അടിച്ചമർത്തുന്നവർക്കെതിരെ മാതൃകാപരമായ നടപടിയുണ്ടാകുമെന്ന് പ്രതീക്ഷിക്കുന്നതായും എ.ഡി. തോമസ് എംഎൽഎ പ്രതികരിച്ചു.
