ലണ്ടൻ: ഡെമോക്രാറ്റിക് റിപ്പബ്ലിക് ഓഫ് കോംഗോയിൽ (DRC) പടർന്നുപിടിക്കുന്ന ഇബോള രോഗബാധയെത്തുടർന്ന് 131 പേർ മരിച്ചതായി സംശയിക്കുന്നതായി ആരോഗ്യവകുപ്പ് അധികൃതർ വ്യക്തമാക്കുന്നു. കിഴക്കൻ കോംഗോയിൽ ഇതുവരെ 513 പേർക്ക് രോഗബാധ സംശയിക്കുന്നതായും ചൊവ്വാഴ്ച ലണ്ടനിൽ പുറത്തുവിട്ട ഔദ്യോഗിക റിപ്പോർട്ടുകൾ വ്യക്തമാക്കുന്നു. രോഗവ്യാപനത്തിന്റെ തീവ്രത കണക്കിലെടുത്ത് ലോകാരോഗ്യ സംഘടന (WHO) അന്താരാഷ്ട്ര ആരോഗ്യ അടിയന്തരാവസ്ഥ പ്രഖ്യാപിച്ചിട്ടുണ്ട്.
നിലവിൽ റിപ്പോർട്ട് ചെയ്യപ്പെട്ട മരണങ്ങളിൽ എത്രയെണ്ണം ഇബോള മൂലമാണെന്ന് സ്ഥിരീകരിക്കാൻ വിശദമായ പരിശോധനകൾ നടക്കുകയാണെന്ന് കോംഗോ പൊതുജനാരോഗ്യ മന്ത്രി സാമുവൽ റോജർ കാംബ അറിയിച്ചു. കോംഗോയിലെ ഇറ്റൂരി പ്രവിശ്യയിൽ മാത്രം 30 ഇബോള കേസുകൾ സ്ഥിരീകരിച്ചിട്ടുണ്ട്. വടക്കൻ കിവു പ്രവിശ്യയുടെ തലസ്ഥാനവും കോംഗോയിലെ വലിയ നഗരങ്ങളിലൊന്നുമായ ഗോമ ഉൾപ്പെടെയുള്ള ജനസാന്ദ്രതയേറിയ നഗരങ്ങളിലേക്ക് രോഗം പടർന്നത് ആശങ്ക വർദ്ധിപ്പിക്കുന്നു. കോംഗോയിൽ നിന്ന് യാത്ര ചെയ്ത രണ്ട് പേർക്ക് അയൽരാജ്യമായ ഉഗാണ്ടയുടെ തലസ്ഥാനമായ കമ്പാലയിലും രോഗബാധ സ്ഥിരീകരിച്ചു. ഇതിൽ ഒരാൾ മരണപ്പെടുകയും ചെയ്തു.
ഇബോള വൈറസിന്റെ അപൂർവ്വ വകഭേദമായ ‘ബുന്ദിബുഗ്യോ’ (Bundibugyo) വൈറസാണ് ഇപ്പോഴത്തെ പടർച്ചയ്ക്ക് കാരണം. ഈ വകഭേദത്തിനെതിരെ നിലവിൽ അംഗീകൃത വാക്സിനുകളോ ഫലപ്രദമായ ചികിത്സകളോ ലഭ്യമല്ല എന്നത് പ്രതിസന്ധിയുടെ ആഴം കൂട്ടുന്നു. കോംഗോയിൽ രോഗികളെ ചികിത്സിക്കുന്നതിനിടെ അമേരിക്കൻ ഡോക്ടറായ പീറ്റർ സ്റ്റാഫോർഡിനും ഇബോള സ്ഥിരീകരിച്ചിട്ടുണ്ട്. രോഗവ്യാപനം തടയാൻ യു.എസ് സെന്റർ ഫോർ ഡിസീസ് കൺട്രോൾ ആൻഡ് പ്രിവൻഷൻ (CDC) അടിയന്തര നിയന്ത്രണ മുറികൾ തുറക്കുകയും മധ്യ ആഫ്രിക്കയിൽ നിന്നുള്ള യാത്രക്കാർക്ക് നിയന്ത്രണം ഏർപ്പെടുത്താൻ ഒരുങ്ങുകയും ചെയ്യുകയാണ്.
