സിഡ്നി: ഓസ്ട്രേലിയൻ ഗോൾഫ് കോഴ്സിൽ നിന്നുള്ള അപൂർവ്വവും കൗതുകമുണർത്തുന്നതുമായ ഒരു ദൃശ്യം ഇപ്പോൾ സമൂഹമാധ്യമങ്ങളിൽ വൻതോതിൽ വൈറലാവുകയാണ്. ഒരു കൂട്ടം സുഹൃത്തുക്കൾ ഗോൾഫ് കളിക്കാനെത്തിയപ്പോഴാണ് കോഴ്സിലെ ഗ്രീൻ ഏരിയയിൽ സ്ഥാപിച്ചിരുന്ന ഫ്ലാഗ്സ്റ്റിക്കിനോട് (കൊടിമരം) ഒരു ഭീമൻ കംഗാരു ഒറ്റയ്ക്ക് അങ്കം വെട്ടുന്നത് നേരിട്ട് കണ്ടത്. മനുഷ്യർ ബോക്സിംഗ് പരിശീലനത്തിനായി ‘ഷാഡോ ബോക്സിംഗ്’ ചെയ്യുന്നത് പോലെയായിരുന്നു കംഗാരുവിന്റെ ഈ പോരാട്ടം.
ഒരു പ്രൊഫഷണൽ ബോക്സറെ അനുസ്മരിപ്പിക്കും വിധം വായുവിൽ കൈകൾ ചലിപ്പിച്ചും, കൊടിമരത്തിന് നേരെ കനത്ത പ്രഹരങ്ങൾ (Haymakers) തൊടുത്തുവിട്ടുമായിരുന്നു കംഗാരുവിന്റെ കളി. കാറ്റിൽ ഇളകിയാടുന്ന കൊടിയെ തനിക്കെതിരെയുള്ള എന്തോ ഭീഷണിയായി തെറ്റിദ്ധരിച്ചാകാം കംഗാരു ഇത്തരത്തിൽ ആക്രമണ സ്വഭാവം കാണിച്ചതെന്നാണ് വന്യജീവി വിദഗ്ദ്ധർ വിലയിരുത്തുന്നത്.
ഓസ്ട്രേലിയയിലെ ഗോൾഫ് കോഴ്സുകളിൽ കംഗാരുക്കൾ കൂട്ടത്തോടെ ഇറങ്ങുന്നത് പതിവാണെങ്കിലും, ഒരു ഫ്ലാഗ്സ്റ്റിക്കിനെ ശത്രുവായി പ്രഖ്യാപിച്ച് ഇതുപോലെ ബോക്സിംഗ് നടത്തുന്നത് അത്ര സാധാരണമായ കാഴ്ചയല്ല. അവിടെയുണ്ടായിരുന്ന കളിക്കാർ തന്നെയാണ് കൗതുകകരമായ ഈ ദൃശ്യങ്ങൾ മൊബൈൽ ക്യാമറയിൽ പകർത്തിയത്. “ഈ കംഗാരുവിന് ആരോടോ പഴയ കണക്കുകൾ തീർക്കാനുണ്ട്” എന്ന രസകരമായ അടിക്കുറിപ്പോടെയാണ് വീഡിയോ ഇപ്പോൾ പ്രചരിക്കുന്നത്.
