അട്ടപ്പാടി മധു വധക്കേസിൽ 12 പ്രതികൾക്കും ജീവപര്യന്തം ശിക്ഷ വിധിച്ച് കേരള ഹൈക്കോടതി. മധുവിന്റെ അമ്മ മല്ലിക്ക് 30 ലക്ഷം രൂപ നഷ്ടപരിഹാരം നൽകാനും കോടതി ഉത്തരവിട്ടു. 16-ാം പ്രതിയായ മുനീർ ഒഴികെയുള്ള 2 മുതൽ 15 വരെ പ്രതികൾക്കാണ് നേരത്തെ ലഭിച്ചിരുന്ന ഏഴ് വർഷത്തെ ശിക്ഷ ഹൈക്കോടതി ജീവപര്യന്തമായി ഉയർത്തിയത്.
മരയ്ക്കാർ, ഷംസുദ്ദീൻ, രാധാകൃഷ്ണൻ, അബൂബക്കർ, സിദ്ദിഖ്, ഉബൈദ്, നജീബ്, ജൈജുമോൻ, സജീവ്, സതീഷ്, ഹരീഷ്, ബിജു എന്നിവരാണ് ജീവപര്യന്തം ശിക്ഷ ലഭിച്ചവർ. 16-ാം പ്രതി മുനീറിന് നേരത്തെ ലഭിച്ചിരുന്ന മൂന്ന് മാസത്തെ ശിക്ഷ ഒരു വർഷമായി ഉയർത്തി. ഒന്നാം പ്രതിയായ മേച്ചേരി ഹുസൈനെ തെളിവുകളുടെ അഭാവത്തിൽ ഹൈക്കോടതി കുറ്റവിമുക്തനാക്കി. നാലാം പ്രതിയെയും 11-ാം പ്രതിയെയും കുറ്റവിമുക്തരാക്കിയ മണ്ണാർക്കാട് എസ്സി/എസ്ടി പ്രത്യേക കോടതിയുടെ നടപടി ഹൈക്കോടതി ശരിവെക്കുകയും ചെയ്തു.
2018 ഫെബ്രുവരി 22-നാണ് അട്ടപ്പാടിയിലെ ചിണ്ടക്കി സ്വദേശിയായ ആദിവാസി യുവാവ് മധു ആൾക്കൂട്ട മർദനത്തിനിരയായി കൊല്ലപ്പെട്ടത്. ഭക്ഷ്യസാധനങ്ങൾ മോഷ്ടിച്ചെന്നാരോപിച്ചായിരുന്നു മർദനം. കേസിൽ 16 പേർ പ്രതികളായിരുന്നു. 2023-ൽ മണ്ണാർക്കാട് പ്രത്യേക കോടതി 13 പ്രതികൾക്ക് ഏഴ് വർഷം കഠിന തടവും ഒരാൾക്ക് മൂന്ന് മാസം തടവും വിധിച്ചിരുന്നു. ഇതിനെതിരെ സംസ്ഥാന സർക്കാരും മധുവിന്റെ അമ്മയും ഹൈക്കോടതിയെ സമീപിക്കുകയായിരുന്നു.
