ഗ്രേറ്റർ നോയിഡ: ഉത്തർപ്രദേശിലെ ജേവാറിൽ വാണിജ്യ സർവീസുകൾ ആരംഭിച്ച നോയിഡ അന്താരാഷ്ട്ര വിമാനത്താവളത്തിൽ കൗതുകക്കാഴ്ചയായി കുട്ടി യാത്രികൻ. വിമാനത്താവളത്തിൽ ആദ്യമായി ലാൻഡ് ചെയ്ത വാണിജ്യ വിമാനത്തിൽ പൈലറ്റിന്റെ ഔദ്യോഗിക വേഷമണിഞ്ഞാണ് ഒരു കൊച്ചുമിടുക്കൻ യാത്രക്കാ രനായി എത്തിയത്. വിമാനത്താവളത്തിന്റെ ചരിത്രപരമായ ആദ്യ സർവീസിന് സാക്ഷ്യം വഹിക്കാനെത്തിയ ജീവനക്കാർക്കും യാത്രക്കാർക്കും ഈ കുട്ടിയുടെ വരവ് ഏറെ ആവേശവും കൗതുകവുമുണർത്തി.
രാജ്യത്തെ സിവിൽ വ്യോമയാന മേഖലയിലെ വലിയൊരു നാഴികക്കല്ലായ ഈ ആദ്യ സർവീസിന്റെ ഭാഗമാകാൻ പൈലറ്റിന്റെ യൂണിഫോമും തൊപ്പിയുമണിഞ്ഞ് എത്തിയ കുട്ടി യാത്രികനെ വിമാനത്താവള അധികൃതരും ജീവനക്കാരും ചേർന്ന് വലിയ ഹർഷാരവത്തോടെയാണ് സ്വീകരിച്ചത്. വിമാനത്തിൽ നിന്നും പുറത്തിറങ്ങിയ ഈ കുട്ടി പൈലറ്റ് വിമാനത്താവളത്തിലെ ഉദ്ഘാടന ചടങ്ങുകളുടെ പ്രധാന ആകർഷണങ്ങളിലൊന്നായി മാറി.
ദേശീയ തലസ്ഥാന മേഖലയിലെ വ്യോമയാന ചരിത്രത്തിൽ പുതിയ അധ്യായം കുറിച്ചുകൊണ്ട് ഇന്ന് രാവിലെയാണ് നോയിഡ അന്താരാഷ്ട്ര വിമാനത്താവളത്തിൽ ആദ്യ വാണിജ്യ വിമാനം വിജയകരമായി ലാൻഡ് ചെയ്തത്. ആദ്യ ഘട്ടത്തിൽ പ്രതിവർഷം 1.2 കോടി യാത്രക്കാരെ കൈകാര്യം ചെയ്യാൻ ശേഷിയുള്ള ഈ വിമാനത്താവളത്തിന്റെ ഉദ്ഘാടന ദിവസം തന്നെ ഇത്തരം അപൂർവ്വവും മനോഹരവുമായ നിമിഷങ്ങൾക്ക് സാക്ഷ്യം വഹിക്കാൻ കഴിഞ്ഞതിന്റെ സന്തോഷത്തിലാണ് വിമാനത്താവള അധികൃതർ
