ഇംഫാൽ: മണിപ്പൂരിലെ സെനാപതി ജില്ലയിൽ അസം റൈഫിൾസ് നടത്തിയ തെരച്ചിൽ നടപടിക്ക് പിന്നാലെ വീണ്ടും സംഘർഷാവസ്ഥ രൂപപ്പെട്ടു. ചൊവ്വാഴ്ച രാത്രി വലിയൊരു സംഘം അസം റൈഫിൾസ് ക്യാമ്പ് ആക്രമിക്കുകയും സുരക്ഷാസേനയുടെ വാഹനങ്ങൾ നശിപ്പിക്കുകയും തീയിടുകയും ചെയ്തു.
പ്രതിരോധ വകുപ്പിന്റെ വിവരമനുസരിച്ച്, മകുയിലോങ്ഡി പ്രദേശത്ത് ആയുധധാരികളുടെ സാന്നിധ്യമുണ്ടെന്ന രഹസ്യവിവരത്തെ തുടർന്ന് അസം റൈഫിൾസ് മേഖലയിൽ തെരച്ചിലും ആധിപത്യ പട്രോളിംഗും നടത്തി. നടപടിക്കിടെ പ്രദേശവാസികൾ പ്രതിഷേധിച്ചതിനെ തുടർന്ന് സേന പിൻവാങ്ങിയെങ്കിലും പിന്നീട് വലിയ ജനക്കൂട്ടം ക്യാമ്പിലെത്തി കല്ലേറും ആക്രമണവും നടത്തി.
ആക്രമണത്തിൽ ഒരു ലൈറ്റ് വാഹനം കത്തിനശിക്കുകയും രണ്ട് ട്രക്കുകൾ മറിച്ചിടുകയും കേടുപാടുകൾ സംഭവിക്കുകയും ചെയ്തു. ഒരു സ്വകാര്യ കാറിനും തീപിടിച്ചു. സ്ഥിതിഗതികൾ നിയന്ത്രണവിധേയമാക്കാൻ അസം റൈഫിൾസിനൊപ്പം മണിപ്പൂർ പോലീസും സി.ആർ.പി.എഫും വിന്യസിച്ചു. പരമാവധി സംയമനം പാലിച്ചാണ് സുരക്ഷാസേന ജനക്കൂട്ടത്തെ പിരിച്ചുവിട്ടതെന്ന് അധികൃതർ അറിയിച്ചു.
