കൈറോ: ഗാസയിലെ വെടിനിർത്തൽ നീക്കങ്ങൾ പുനരുജ്ജീവിപ്പിക്കുന്നതിന്റെ ഭാഗമായി യുഎസ് പ്രതിനിധി ജാരെഡ് കുഷ്നർ ഹമാസ് നേതാവ് ഖലീൽ അൽ-ഹയ്യയുമായി കൂടിക്കാഴ്ച നടത്തി. അമേരിക്കൻ പ്രസിഡന്റ് ഡോണൾഡ് ട്രംപ് മുന്നോട്ടുവച്ച ഗാസ സമാധാന പദ്ധതിയുടെ തുടർനടപടികളുടെ ഭാഗമായാണ് കൂടിക്കാഴ്ച.
ഈജിപ്തിൽ നടന്ന ചർച്ചയിൽ ഈജിപ്ത്, ഖത്തർ, തുർക്കി എന്നിവിടങ്ങളിൽ നിന്നുള്ള നയതന്ത്ര പ്രതിനിധികളും പങ്കെടുത്തു. ഗാസയിലെ വെടിനിർത്തൽ, ഇസ്രയേൽ സൈനിക പിൻമാറ്റം, ഹമാസിന്റെ ആയുധനിരായുധീകരണം തുടങ്ങിയ വിഷയങ്ങളാണ് പുതിയ സമാധാന റോഡ്മാപ്പിലെ പ്രധാന ഘടകങ്ങൾ.
ഹമാസ് പദ്ധതിയോട് തത്വത്തിൽ അനുകൂല നിലപാട് സ്വീകരിച്ചിട്ടുണ്ടെങ്കിലും, ഇസ്രയേൽ സൈന്യം ഗാസയിലെ നിയന്ത്രണത്തിലുള്ള പ്രദേശങ്ങളിൽനിന്ന് പിൻമാറണമെന്നും ആക്രമണങ്ങൾ അവസാനിപ്പിക്കണമെന്നും ഹമാസ് ആവശ്യപ്പെടുന്നു. മറുവശത്ത്, ഹമാസ് പൂർണമായി ആയുധം ഉപേക്ഷിക്കുന്നതിന് മുൻപ് ഇസ്രയേൽ പിൻമാറാൻ തയ്യാറല്ലെന്ന നിലപാടിലാണ് പ്രധാനമന്ത്രി ബെഞ്ചമിൻ നെതന്യാഹു.
ഹമാസ് നേതാവുമായുള്ള കൂടിക്കാഴ്ചയ്ക്ക് പിന്നാലെ കുഷ്നർ നെതന്യാഹുവുമായും ചർച്ച നടത്തി. എന്നാൽ രണ്ട് ദിവസത്തെ നയതന്ത്ര നീക്കങ്ങൾക്കൊടുവിലും സമാധാന പദ്ധതിയിൽ നിർണായക ധാരണയിലെത്താൻ കഴിഞ്ഞിട്ടില്ലെന്നാണ് റിപ്പോർട്ടുകൾ. അതേസമയം, ഹമാസിന്റെ നിരായുധീകരണവും ഗാസയിലെ ആരോഗ്യസംവിധാനവുമായി ബന്ധപ്പെട്ട വിഷയങ്ങളും പരിശോധിക്കാൻ പ്രവർത്തക സംഘങ്ങൾ രൂപീകരിക്കാൻ ധാരണയായിട്ടുണ്ട്.
അതുകൊണ്ട് തന്നെ കുഷ്നറുടെ കൂടിക്കാഴ്ചകൾ സമാധാനശ്രമങ്ങൾക്ക് പുതിയ നയതന്ത്ര ചാനൽ തുറന്നെങ്കിലും, ഹമാസിന്റെ നിരായുധീകരണവും ഇസ്രയേൽ സൈനിക പിൻമാറ്റവും ഏത് ക്രമത്തിൽ നടപ്പാക്കണമെന്നതിലെ തർക്കം തുടരുകയാണ്.
