ത തിരുവനന്തപുരം: തിരുവനന്തപുരം മെട്രോ പദ്ധതിയുടെ പരിഷ്കരിച്ച വിശദ പദ്ധതി രേഖ (ഡിപിആർ) കൊച്ചി മെട്രോ റെയിൽ ലിമിറ്റഡ് (KMRL) സംസ്ഥാന സർക്കാരിന് സമർപ്പിച്ചു. ഡൽഹി മെട്രോ റെയിൽ കോർപറേഷൻ (DMRC) നടത്തിയ സാങ്കേതിക പരിശോധനയ്ക്കും സ്ഥലപരിശോധനയ്ക്കും ശേഷമാണ് ഡിപിആറിൽ ആവശ്യമായ മാറ്റങ്ങൾ വരുത്തിയത്.
പദ്ധതി രാജ്യത്തെ ഏറ്റവും ആധുനികവും സാങ്കേതികമായി മികച്ചതുമായ മെട്രോ സംവിധാനങ്ങളിലൊന്നായി വികസിപ്പിക്കുകയാണ് ലക്ഷ്യമെന്ന് അധികൃതർ വ്യക്തമാക്കി. യാത്രക്കാർക്ക് കൂടുതൽ സൗകര്യപ്രദമായ സംവിധാനങ്ങൾ ഒരുക്കുന്നതിനൊപ്പം നഗരത്തിലെ വിവിധ ഗതാഗത മാർഗങ്ങളെ പരസ്പരം ബന്ധിപ്പിക്കുന്ന രീതിയിലാണ് പദ്ധതി വിഭാവനം ചെയ്തിരിക്കുന്നത്.
ഏകദേശം 31 കിലോമീറ്റർ ദൈർഘ്യമുള്ള മെട്രോ ഇടനാഴിയാണ് പരിഷ്കരിച്ച ഡിപിആറിൽ പരിഗണിച്ചിരിക്കുന്നത്. നഗരത്തിന്റെ ഗതാഗത ആവശ്യങ്ങൾ കണക്കിലെടുത്ത് ഉയർന്നതും ഭൂഗർഭവുമായ ഭാഗങ്ങൾ ഉൾപ്പെടുന്ന ഹൈബ്രിഡ് സംവിധാനമാണ് നിർദേശിച്ചിട്ടുള്ളത്.
പാപ്പനംകോട്, അനയറ എന്നിവിടങ്ങളിൽ പ്രധാന ഇന്റർമോഡൽ ഗതാഗത ഹബ്ബുകൾ വികസിപ്പിക്കാനും ഡിപിആറിൽ നിർദേശമുണ്ട്. മെട്രോയ്ക്ക് പുറമെ ബസ് ഉൾപ്പെടെയുള്ള മറ്റ് പൊതുഗതാഗത സംവിധാനങ്ങളുമായി യാത്രക്കാർക്ക് എളുപ്പത്തിൽ മാറാൻ കഴിയുന്ന രീതിയിലായിരിക്കും ഇവ ഒരുക്കുക. നഗരത്തിലെ ഗതാഗതക്കുരുക്ക് കുറയ്ക്കാനും യാത്രാസൗകര്യം മെച്ചപ്പെടുത്താനും ഇതിലൂടെ ലക്ഷ്യമിടുന്നു.
DMRC നടത്തിയ സ്ഥലപരിശോധനയിൽ ലഭിച്ച നിർദേശങ്ങൾ പരിഗണിച്ചാണ് ഡിപിആറിൽ ചില സാങ്കേതിക മാറ്റങ്ങൾ വരുത്തിയത്. പദ്ധതി നടപ്പാക്കുന്നതിന് സംസ്ഥാന സർക്കാരിന്റെയും തുടർന്ന് കേന്ദ്രതലത്തിലെയും ആവശ്യമായ അനുമതികൾ ലഭിക്കേണ്ടതുണ്ട്.
തിരുവനന്തപുരം നഗരത്തിന്റെ വർധിച്ചുവരുന്ന ഗതാഗത ആവശ്യങ്ങൾ പരിഹരിക്കുന്നതിനുള്ള പ്രധാന പൊതുഗതാഗത പദ്ധതിയായാണ് മെട്രോയെ സർക്കാർ പരിഗണിക്കുന്നത്. ഡിപിആർ സമർപ്പിച്ചതോടെ പദ്ധതിയുടെ തുടർനടപടികൾ വേഗത്തിലാക്കാനുള്ള സാധ്യതയാണ് ഇപ്പോൾ തുറന്നിരിക്കുന്നത്.
