ന്യൂഡൽഹി: ആഗോള വ്യാപാരം തടസങ്ങളില്ലാതെ മുന്നോട്ടുപോകേണ്ടത് അനിവാര്യമാണെന്ന് പ്രധാനമന്ത്രി നരേന്ദ്ര മോദി. വ്യാപാര തടസങ്ങൾ കുറയ്ക്കുകയും വിപണികൾ കൂടുതൽ തുറന്നതാക്കുകയും ചെയ്യേണ്ടതുണ്ടെന്നും അദ്ദേഹം പറഞ്ഞു. ന്യൂഡൽഹിയിൽ നടക്കുന്ന ബ്രിക്സ് ഉച്ചകോടിയുടെ പശ്ചാത്തലത്തിലാണ് പ്രധാനമന്ത്രിയുടെ പരാമർശം.
ലോക വ്യാപാര അന്തരീക്ഷം കൂടുതൽ സങ്കീർണമാകുന്ന സാഹചര്യത്തിൽ രാജ്യങ്ങൾ പരസ്പര സഹകരണം ശക്തിപ്പെടുത്തേണ്ടതുണ്ടെന്ന് മോദി വ്യക്തമാക്കി. തീരുവകളും മറ്റ് നിയന്ത്രണങ്ങളും ആഗോള വ്യാപാരത്തെ ബാധിക്കുന്ന സാഹചര്യത്തിലാണ് ഇന്ത്യയുടെ നിലപാട് അദ്ദേഹം വ്യക്തമാക്കിയത്.
വ്യാപാര തടസങ്ങൾ ഒഴിവാക്കുന്നതിനൊപ്പം പ്രാദേശിക കറൻസികളിലുള്ള ഇടപാടുകൾ പ്രോത്സാഹിപ്പിക്കുക, പേയ്മെന്റ് സംവിധാനങ്ങൾ തമ്മിൽ ബന്ധിപ്പിക്കുക തുടങ്ങിയ നിർദേശങ്ങളും ബ്രിക്സ് വേദിയിൽ ഉയർന്നു. സേവനമേഖലയിലെ വ്യാപാരം കൂടുതൽ സുഗമമാക്കേണ്ടതിന്റെ ആവശ്യകതയും ഇന്ത്യ മുന്നോട്ടുവച്ചു.
ആഗോള വ്യാപാരത്തിൽ കൂടുതൽ തുറന്നതും സുതാര്യവുമായ സംവിധാനമാണ് ഇന്ത്യ ആവശ്യപ്പെടുന്നതെന്നും വികസ്വര രാജ്യങ്ങളുടെ സാമ്പത്തിക താൽപര്യങ്ങൾ സംരക്ഷിക്കുന്നതിനായി സഹകരണം ശക്തിപ്പെടുത്തണമെന്നുമാണ് ഇന്ത്യയുടെ നിലപാട്.
