പാരിസ്: ആഗോള സുരക്ഷാ സാഹചര്യങ്ങൾ മാറുന്നതിനിടെ ഫ്രാൻസുമായുള്ള സാമ്പത്തിക, പ്രതിരോധ ബന്ധം കൂടുതൽ ശക്തമാക്കാൻ കാനഡ. കനേഡിയൻ പ്രധാനമന്ത്രി മാർക്ക് കാർണിയും ഫ്രഞ്ച് പ്രസിഡന്റ് ഇമ്മാനുവൽ മാക്രോണും സെന്റ് പിയർ-എറ്റ്-മിക്വലോണിൽ നടത്തിയ കൂടിക്കാഴ്ചയിലാണ് സഹകരണം വിപുലീകരിക്കാൻ തീരുമാനിച്ചത്.
പ്രതിരോധം, ബഹിരാകാശം, ഊർജം, നിർണായക ധാതുക്കൾ, കൃത്രിമബുദ്ധി തുടങ്ങിയ തന്ത്രപ്രധാന മേഖലകളിൽ സഹകരണം ശക്തമാക്കാനാണ് തീരുമാനം. ഇരുരാജ്യങ്ങളുടെയും ബഹിരാകാശ ഏജൻസികളും പ്രതിരോധ മന്ത്രാലയങ്ങളും ചേർന്ന് ബഹിരാകാശ വിക്ഷേപണ സംവിധാനങ്ങളും ഭൂതല സ്വീകരണ-നിയന്ത്രണ സംവിധാനങ്ങളും വികസിപ്പിക്കുന്നതിനുള്ള പ്രവർത്തനങ്ങൾ ആരംഭിക്കും.
കാനഡയും ഫ്രാൻസും തമ്മിലുള്ള വ്യാപാരബന്ധം കൂടുതൽ വിപുലീകരിക്കാനും ധാരണയായി. കനേഡിയൻ ചേംബർ ഓഫ് കൊമേഴ്സും ഫ്രാൻസിലെ ചേംബർ ഓഫ് കൊമേഴ്സ് ആൻഡ് ഇൻഡസ്ട്രിയും ചേർന്ന് പുതിയ തന്ത്രപ്രധാന പങ്കാളിത്തം ആരംഭിച്ചിട്ടുണ്ട്. ഉഭയകക്ഷി വ്യാപാരം വർധിപ്പിക്കുകയും വ്യാപാര പങ്കാളികളെ വൈവിധ്യവത്കരിക്കുകയും ചെയ്യുകയാണ് ലക്ഷ്യം.
2025ൽ കാനഡയും ഫ്രാൻസും തമ്മിലുള്ള ചരക്ക് വ്യാപാരത്തിന്റെ ആകെ മൂല്യം 15.2 ബില്യൺ കനേഡിയൻ ഡോളറായിരുന്നു. കഴിഞ്ഞ പത്ത് വർഷത്തിനിടെ ഇരുരാജ്യങ്ങളും തമ്മിലുള്ള വ്യാപാരം ഏകദേശം മൂന്നിൽ രണ്ട് വർധിച്ചതായും കനേഡിയൻ സർക്കാർ കണക്കുകൾ വ്യക്തമാക്കുന്നു.
അമേരിക്കയുമായുള്ള വ്യാപാര-രാഷ്ട്രീയ ബന്ധങ്ങളിൽ സമ്മർദം നിലനിൽക്കുന്ന സാഹചര്യത്തിലാണ് കാനഡ യൂറോപ്യൻ രാജ്യങ്ങളുമായുള്ള ബന്ധം കൂടുതൽ ശക്തമാക്കുന്നത്. യുഎസിനെ ആശ്രയിക്കുന്നത് കുറച്ച് വ്യാപാരബന്ധങ്ങൾ വൈവിധ്യവത്കരിക്കുന്നതിനുള്ള ശ്രമങ്ങളുടെ ഭാഗമായാണ് ഫ്രാൻസുമായുള്ള സഹകരണത്തിനും കനേഡിയൻ സർക്കാർ പ്രാധാന്യം നൽകുന്നത്.
അതേസമയം, യുക്രെയ്ൻ യുദ്ധം, യൂറോപ്യൻ-അറ്റ്ലാന്റിക് സുരക്ഷ, മധ്യപൂർവദേശം, ആർട്ടിക് മേഖല, ഊർജസുരക്ഷ തുടങ്ങിയ വിഷയങ്ങളും കാർണിയും മാക്രോണും ചർച്ച ചെയ്തു. പ്രതിരോധ മേഖലയിലെ സഹകരണം ഉൾപ്പെടെ കാനഡയും യൂറോപ്യൻ യൂണിയനും തമ്മിലുള്ള ബന്ധം കൂടുതൽ ശക്തമാക്കേണ്ടതിന്റെ ആവശ്യകതയും ഇരുവരും ചൂണ്ടിക്കാട്ടി.
