ഗജൽഡോബ: തീസ്ത നദിയിലെ ശക്തമായ ഒഴുക്കിൽപ്പെട്ട് ഒഴുകിപ്പോയ മൂന്നോ നാലോ ദിവസം മാത്രം പ്രായമുള്ള ആനക്കുട്ടിയെ പ്രാദേശിക മത്സ്യത്തൊഴിലാളികൾ സാഹസികമായി രക്ഷപ്പെടുത്തി അമ്മയോടൊപ്പം ചേർത്തു. നദി മുറിച്ചുകടക്കുന്നതിനിടെയാണ് ആനക്കുട്ടി അമ്മയിൽനിന്ന് വേർപെട്ടത്. തീസ്ത ബാരേജിന്റെ മുകൾഭാഗത്തുനിന്ന് ശക്തമായ ഒഴുക്കിൽപ്പെട്ട് താഴേക്ക് ഒഴുകിവന്ന കുട്ടിയാനയെ മത്സ്യത്തൊഴിലാളികളായ അജയ് ദാസ്, രാജേഷ് ദാസ്, ഗോപാൽ ദാസ്, മിട്ടു ദാസ്, ബിശ്വനാഥ് ദാസ് എന്നിവർ കാണുകയായിരുന്നു.
തുടർന്ന് സ്വന്തം ജീവൻ പോലും പണയംവെച്ച് വെള്ളത്തിലിറങ്ങിയ മത്സ്യത്തൊഴിലാളികൾ, ഏകദേശം രണ്ട് മണിക്കൂർ നീണ്ട കഠിന പരിശ്രമത്തിനൊടുവിൽ കുട്ടിയാനയെ നദിയിലെ ഒരു തുരുത്തിൽ സുരക്ഷിതമായി എത്തിച്ചു. വിവരമറിഞ്ഞ് ബൈകുണ്ഠപൂർ ഫോറസ്റ്റ് ഡിവിഷനിലെ വനംവകുപ്പ് ഉദ്യോഗസ്ഥരും സ്ഥലത്തെത്തി. തുരുത്തിൽ അമ്മയെ തേടി കുട്ടിയാന തുടർച്ചയായി കരഞ്ഞുകൊണ്ടിരുന്നതോടെ അമ്മയാനയെ കണ്ടെത്താനുള്ള ശ്രമങ്ങളും രക്ഷാസംഘം ഊർജ്ജിതമാക്കി.
ഒടുവിൽ ഏകദേശം രണ്ട് മണിക്കൂറിനുശേഷം ഗജൽഡോബയിലെ തീസ്ത നദിയിലെ തുരുത്തിൽ വെച്ച് കുട്ടിയാനയെ വനംവകുപ്പ് അമ്മയോടൊപ്പം വീണ്ടും ഒരുമിപ്പിച്ചു. മനുഷ്യത്വത്തിന്റെയും വന്യജീവി സംരക്ഷണത്തിന്റെയും ഹൃദയസ്പർശിയായ ഉദാഹരണമായി മാറിയിരിക്കുകയാണ് ഈ രക്ഷാപ്രവർത്തനം.
