ന്യൂഡൽഹി: ഫ്ലൈദുബായ് വിമാനത്തിലെ ഇന്ത്യൻ ക്യാപ്റ്റൻ സ്മിത് മച്ച്ഛറിനെ ആക്രമിച്ച ഒമാനി സഹപൈലറ്റിന്റെ സാമൂഹികമാധ്യമ അക്കൗണ്ടുകളിൽ ജൂതന്മാരെ കൊല്ലുന്നതിനെക്കുറിച്ചുള്ള പരാമർശങ്ങളുണ്ടായിരുന്നുവെന്ന് ഇസ്രയേലി ഉദ്യോഗസ്ഥൻ. ആക്രമണത്തിന് പിന്നിലെ ഉദ്ദേശ്യം വ്യക്തമാക്കുന്നതിനായി അന്വേഷണം തുടരുന്നതിനിടെയാണ് ഈ വിവരം പുറത്തുവന്നത്.
സഹപൈലറ്റ് ജിഹാദി ആശയങ്ങളിലേക്ക് തീവ്രവൽക്കരിക്കപ്പെട്ടിരുന്നതായി സാമൂഹികമാധ്യമ അക്കൗണ്ടുകൾ സൂചിപ്പിക്കുന്നുവെന്നാണ് ഉദ്യോഗസ്ഥന്റെ അവകാശവാദം. ആക്രമണത്തിന് ശേഷം തന്നെ കൊല്ലാൻ ആവശ്യപ്പെട്ടതായും വിമാനത്തിലുണ്ടായിരുന്ന യാത്രക്കാരുടെ മൊഴികളെ ഉദ്ധരിച്ച് ഉദ്യോഗസ്ഥൻ പറഞ്ഞു. എന്നാൽ അന്വേഷണത്തിന്റെ അന്തിമഫലം പുറത്തുവരുന്നതുവരെ ആക്രമണത്തിന്റെ കൃത്യമായ ലക്ഷ്യത്തെക്കുറിച്ച് ഉറപ്പിച്ച് പറയാനാകില്ലെന്നും അദ്ദേഹം വ്യക്തമാക്കി.
സെപ്റ്റംബർ 30ന് ദുബായിൽനിന്ന് ടെൽ അവീവിലേക്ക് പോയ ഫ്ലൈദുബായ് FZ1073 വിമാനത്തിലാണ് സംഭവം. സഹപൈലറ്റ് ക്യാപ്റ്റൻ മച്ച്ഛറിനെ കുത്തിപ്പരിക്കേൽപ്പിച്ചതിനെ തുടർന്ന് വിമാനം നിയന്ത്രണം നഷ്ടപ്പെട്ട് താഴേക്ക് പതിച്ചിരുന്നു. പരിക്കേറ്റ ക്യാപ്റ്റൻ കോക്പിറ്റ് വാതിൽ തുറന്നതോടെ യാത്രക്കാർ ഇടപെട്ട് സഹപൈലറ്റിനെ കീഴ്പ്പെടുത്തുകയായിരുന്നു. തുടർന്ന് വിമാനം സൗദി അറേബ്യയിലെ തബൂക്കിൽ അടിയന്തരമായി ഇറക്കി.
ആക്രമണത്തിന് പിന്നിൽ തീവ്രവാദ ലക്ഷ്യമുണ്ടായിരുന്നോയെന്നും സഹപൈലറ്റിന്റെ സാമൂഹികമാധ്യമ ഉള്ളടക്കങ്ങൾ സംഭവവുമായി നേരിട്ട് ബന്ധപ്പെട്ടതാണോയെന്നും അന്വേഷണത്തിലാണ്. യുഎഇ, സൗദി അറേബ്യ, ഇസ്രയേൽ ഉൾപ്പെടെയുള്ള രാജ്യങ്ങളിലെ അധികൃതർ സംഭവത്തിൽ അന്വേഷണം തുടരുകയാണ്.
