ന്യൂഡൽഹി: മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ഡൽഹിയിലും മുംബൈയിലും പ്രതിഷേധം. വോട്ടർപട്ടികയിലെ തിരുത്തലുകളും പേരുകൾ നീക്കം ചെയ്തതുമായി ബന്ധപ്പെട്ട ആരോപണങ്ങളും ഉന്നയിച്ചാണ് പ്രതിഷേധം. വെള്ളിയാഴ്ച ഡൽഹിയിലെ ജന്തർ മന്തറിന് സമീപം പ്രതിഷേധിച്ച നൂറുകണക്കിന് പേരെ പൊലീസ് കസ്റ്റഡിയിലെടുത്തു. മുൻ ഡൽഹി മുഖ്യമന്ത്രി അതിഷി, ആം ആദ്മി പാർട്ടി നേതാവ് സൗരഭ് ഭരദ്വാജ്, സാമൂഹിക പ്രവർത്തകൻ യോഗേന്ദ്ര യാദവ് തുടങ്ങിയവരും കസ്റ്റഡിയിലായതായി റിപ്പോർട്ടുകളുണ്ട്.
പ്രതിഷേധത്തിന് ഡൽഹി പൊലീസ് അനുമതി നൽകിയിരുന്നില്ല. സുരക്ഷാ ക്രമീകരണങ്ങളുടെ ഭാഗമായി സെൻട്രൽ ഡൽഹിയിലെ നിരവധി മെട്രോ സ്റ്റേഷനുകളിൽ പ്രവേശനവും പുറത്തേക്കുള്ള വഴികളും താൽക്കാലികമായി നിയന്ത്രിച്ചു. ജന്തർ മന്തർ ഉൾപ്പെടുന്ന പ്രദേശത്ത് നിരോധനാജ്ഞയും ഏർപ്പെടുത്തിയിരുന്നു.
അതേസമയം, കൊക്രോച്ച് ജനതാ പാർട്ടി (CJP)യുടെ നേതൃത്വത്തിൽ മുംബൈയിലെ ശിവാജി പാർക്കിലും പ്രതിഷേധം നടന്നു. തിരഞ്ഞെടുപ്പ് പട്ടികകളിലെ ക്രമക്കേടുകൾ ആരോപിച്ചാണ് ഗ്യാനേഷ് കുമാറിന്റെ രാജി ആവശ്യപ്പെട്ടത്. പൊലീസ് അനുമതി നിഷേധിച്ചിരുന്നെങ്കിലും പ്രതിഷേധം നടന്നതായി റിപ്പോർട്ടുകൾ പറയുന്നു.
CJP നേതാവ് അഭിജീത് ദിപ്കെ, ഗ്യാനേഷ് കുമാർ രാജിവച്ചില്ലെങ്കിൽ ഒക്ടോബർ 10ന് ഡൽഹിയിലെ ജന്തർ മന്തറിൽ വീണ്ടും പ്രതിഷേധം നടത്തുമെന്ന് പ്രഖ്യാപിച്ചു. രാജ്യത്തിന്റെ വിവിധ ഭാഗങ്ങളിൽനിന്നുള്ളവർ പങ്കെടുക്കണമെന്ന് അദ്ദേഹം ആഹ്വാനം ചെയ്തു. സമരം സമാധാനപരമായിരിക്കുമെന്നും അദ്ദേഹം പറഞ്ഞു.
വോട്ടർപട്ടിക പരിഷ്‌കരണവുമായി ബന്ധപ്പെട്ട ആരോപണങ്ങൾ ഗ്യാനേഷ് കുമാറിനും തിരഞ്ഞെടുപ്പ് കമ്മിഷനും നേരത്തെ തന്നെ നേരിടേണ്ടിവന്നിട്ടുണ്ട്. വോട്ടർപട്ടികയിൽനിന്ന് വലിയ തോതിൽ പേരുകൾ നീക്കം ചെയ്തതായാണ് വിമർശകരുടെ ആരോപണം. എന്നാൽ ആരോപണങ്ങൾ ഗ്യാനേഷ് കുമാർ നിഷേധിച്ചിട്ടുണ്ട്. തിരഞ്ഞെടുപ്പ് കമ്മിഷൻ നടപടിക്രമങ്ങളിലെ ആഭ്യന്തര ചർച്ചകളിൽ വ്യത്യസ്ത അഭിപ്രായങ്ങൾ ഉണ്ടാകുന്നത് സ്വാഭാവികമാണെന്നും വ്യക്തമാക്കിയിട്ടുണ്ട്.
