ന്യൂഡൽഹി: രാജ്യത്തെ പ്രമുഖ വിമാനക്കമ്പനിയായ ഇൻഡിഗോ ആഭ്യന്തര, അന്താരാഷ്ട്ര സർവീസുകൾക്കുള്ള ഇന്ധന സർചാർജ് വർധിപ്പിച്ചു. പശ്ചിമേഷ്യയിലെ രാഷ്ട്രീയ സംഘർഷങ്ങളും വിപണിയിലെ അസ്ഥിരതയും കാരണം വിമാന ഇന്ധനമായ ഏവിയേഷൻ ടർബൈൻ ഫ്യുവലിന്റെ (എ.ടി.എഫ്) വില സമീപകാലത്തെ ഏറ്റവും ഉയർന്ന നിരക്കിലെത്തിയതാണ് ഈ നടപടിക്ക് കാരണം. ഇതോടെ പുതുതായി ടിക്കറ്റ് ബുക്ക് ചെയ്യുന്ന യാത്രക്കാർക്ക് വലിയ സാമ്പത്തിക ബാധ്യത നേരിടേണ്ടി വരും.
യാത്ര ചെയ്യുന്ന ദൂരത്തിനനുസരിച്ചാണ് പുതുക്കിയ നിരക്കുകൾ ഈടാക്കുന്നത്. ആഭ്യന്തര സർവീസുകളിൽ 500 കിലോമീറ്റർ വരെയുള്ള യാത്രകൾക്ക് 375 രൂപയും 2,000 കിലോമീറ്ററിന് മുകളിലുള്ള ദീർഘദൂര സർവീസുകൾക്ക് 1,300 രൂപ വരെയുമാണ് ഇന്ധന സർചാർജ് വരുന്നത്. അന്താരാഷ്ട്ര റൂട്ടുകളിൽ സാർക്ക് (SAARC) രാജ്യങ്ങളിലേക്ക് 1,000 രൂപ മുതൽ 3,000 രൂപ വരെയും മറ്റ് വിദേശ രാജ്യങ്ങളിലേക്ക് 5,500 രൂപ മുതൽ 10,000 രൂപ വരെയുമാണ് പുതിയ നിരക്ക് നിശ്ചയിച്ചിരിക്കുന്നത്.
ഇന്ധനവിലയിലുണ്ടായ വർധനവ് പൂർണ്ണമായി യാത്രക്കാരിലേക്ക് അടിച്ചേൽപ്പിച്ചിട്ടില്ലെന്നും കമ്പനിയുടെ പ്രവർത്തനച്ചെലവ് കുറയ്ക്കുന്നതിന്റെ ഭാഗമായാണ് ഈ ചെറിയ മാറ്റങ്ങൾ വരുത്തിയതെന്നും ഇൻഡിഗോ വ്യക്തമാക്കി. എന്നിരുന്നാലും, ഉത്സവ സീസൺ അടുത്തിരിക്കെ വിമാന നിരക്ക് ഉയരുന്നത് യാത്രക്കാർക്ക് കനത്ത തിരിച്ചടിയാകും. വരും ദിവസങ്ങളിൽ മറ്റ് വിമാനക്കമ്പനികളും സമാനമായ രീതിയിൽ ടിക്കറ്റ് നിരക്കുകൾ വർധിപ്പിക്കാൻ സാധ്യതയുണ്ട്.
