ലണ്ടൻ: പ്രശസ്ത ബ്രിട്ടീഷ് എഴുത്തുകാരനും മുൻ കൺസർവേറ്റീവ് പാർട്ടി എംപിയുമായ ജെഫ്രി ആർച്ചർ (86) അന്തരിച്ചു. തിങ്കളാഴ്ച ലണ്ടനിലെ വസതിയിൽ എഴുത്തിനിടെയായിരുന്നു അന്ത്യം. അപ്രതീക്ഷിതമായും സമാധാനപരമായുമായിരുന്നു മരണമെന്ന് പ്രസാധകരായ ഹാർപ്പർകോളിൻസ് അറിയിച്ചു.
അഞ്ച് പതിറ്റാണ്ടിലേറെ നീണ്ട സാഹിത്യജീവിതത്തിൽ ആർച്ചറുടെ പുസ്തകങ്ങളുടെ 30 കോടിയിലധികം കോപ്പികൾ ലോകമെമ്പാടും വിറ്റഴിച്ചിട്ടുണ്ട്. Not a Penny More, Not a Penny Less, Kane and Abel, Clifton Chronicles തുടങ്ങിയ കൃതികളിലൂടെയാണ് അദ്ദേഹം ശ്രദ്ധേയനായത്. 1979ൽ പുറത്തിറങ്ങിയ Kane and Abel അദ്ദേഹത്തിന്റെ ഏറ്റവും ജനപ്രിയ കൃതികളിലൊന്നായി മാറി.
1969ൽ ലിങ്കൺഷയറിലെ ലൗത്ത് മണ്ഡലത്തിൽനിന്ന് കൺസർവേറ്റീവ് എംപിയായി തെരഞ്ഞെടുക്കപ്പെട്ട ആർച്ചർ അഞ്ച് വർഷം പാർലമെന്റ് അംഗമായിരുന്നു. പിന്നീട് കൺസർവേറ്റീവ് പാർട്ടിയുടെ ഡെപ്യൂട്ടി ചെയർമാനായും പ്രവർത്തിച്ചു. 1992ൽ ലൈഫ് പിയർ പദവി ലഭിച്ചതിനെ തുടർന്ന് ഹൗസ് ഓഫ് ലോർഡ്സിലും അംഗമായി. 2024ൽ അദ്ദേഹം ഹൗസ് ഓഫ് ലോർഡ്സിൽനിന്ന് വിരമിച്ചു.
രാഷ്ട്രീയജീവിതത്തിനിടെ വിവാദങ്ങളും അദ്ദേഹത്തെ പിന്തുടർന്നു. ഡെയിലി സ്റ്റാർ പത്രത്തിനെതിരായ മാനനഷ്ടക്കേസിൽ വ്യാജസാക്ഷ്യം നൽകിയെന്ന കേസിൽ 2001ൽ പെർജറി, നീതിന്യായ നടപടികളെ വഴിതെറ്റിക്കൽ എന്നീ കുറ്റങ്ങൾക്ക് ശിക്ഷിക്കപ്പെട്ടു. നാല് വർഷത്തെ തടവുശിക്ഷ ലഭിച്ചെങ്കിലും 2003ൽ മോചിതനായി.
അദ്ദേഹത്തിന്റെ അവസാന നോവലായ Adam and Eve പുറത്തിറങ്ങാനിരിക്കെയാണ് മരണം. മരണത്തിന് തൊട്ടുമുമ്പ് ലണ്ടനിൽ വായനക്കാരുമായി കൂടിക്കാഴ്ച നടത്തി പുസ്തകങ്ങളിൽ ഒപ്പുവെച്ചിരുന്നു.
