ന്യൂഡൽഹി: ഡൽഹി പോലീസ് അനുമതി നിഷേധിച്ചെങ്കിലും ശനിയാഴ്ച (ഒക്ടോബർ 10) പ്രഖ്യാപിച്ച സമരത്തിൽ നിന്ന് പിന്നോട്ടില്ലെന്ന് സിറ്റിസൺസ് ഫോർ ജസ്റ്റിസ് ആൻഡ് പീസ് (സി.ജെ.പി) വ്യക്തമാക്കി. ജന്തർ മന്തറിൽ കുത്തിയിരുന്ന് പ്രതിഷേധിക്കുമെന്നും ഗ്യാനേഷ് കുമാറിന്റെ രാജി ആവശ്യത്തിൽ വിട്ടുവീഴ്ചയില്ലെന്നും നേതാക്കൾ അറിയിച്ചു. പ്രതിഷേധത്തിന് പൂർണ്ണ പിന്തുണ പ്രഖ്യാപിച്ച ആം ആദ്മി പാർട്ടിയും (എ.എ.പി) മാർച്ചിൽ പങ്കെടുക്കും. ഇതിനുപുറമെ ഐസ, എസ്.എഫ്.ഐ, എ.ഐ.എസ്.എഫ് തുടങ്ങിയ പ്രമുഖ വിദ്യാർത്ഥി സംഘടനകളും സമരത്തിൽ അണിനിരക്കും.
ജനാധിപത്യ സംവിധാനത്തിൽ പ്രതിഷേധിക്കാൻ പ്രത്യേക അനുമതി ആവശ്യമില്ലെന്നും സർക്കാരിനെതിരെ പ്രതിഷേധിക്കുമ്പോൾ അതേ സർക്കാരിനോട് എങ്ങനെയാണ് അനുമതി ചോദിക്കുകയെന്നും സി.ജെ.പി സഹ കൺവീനർ സൗരവ് ദാസ് വ്യക്തമാക്കി. പ്രതിഷേധം സംബന്ധിച്ച് പിന്നീട് തർക്കങ്ങളുണ്ടാകാതിരിക്കാൻ പാർലമെന്റ് സ്ട്രീറ്റ് പോലീസ് സ്റ്റേഷനിൽ ഔദ്യോഗിക അറിയിപ്പ് നൽകിയിട്ടുണ്ട്. ജന്തർ മന്തർ പ്രതിഷേധങ്ങൾക്കുള്ള വേദിയാണെന്നും ക്രമസമാധാനവും സുരക്ഷയും ഗതാഗതവും നിയന്ത്രിക്കുകയാണ് പോലീസിന്റെ ചുമതലയെന്നും അദ്ദേഹം പറഞ്ഞു.
ഒക്ടോബർ രണ്ടിന് മുംബൈയിലെ ശിവാജി പാർക്കിൽ നടന്ന പ്രതിഷേധത്തിന് പിന്നാലെയാണ് ഗ്യാനേഷ് കുമാർ രാജിവെച്ചില്ലെങ്കിൽ രാജ്യവ്യാപകമായി ഡൽഹിയിലേക്ക് മാർച്ച് നടത്തുമെന്ന് സി.ജെ.പി സ്ഥാപകൻ അഭിജീത് ദീപ്‌കെ പ്രഖ്യാപിച്ചത്. അതേസമയം, മഹാരാഷ്ട്രയിലെ സി.ജെ.പി പ്രവർത്തകരെ ഡൽഹിയിലെ പ്രതിഷേധത്തിൽ നിന്ന് പിന്തിരിപ്പിക്കാൻ ചന്ദ്രപൂർ പോലീസ് ശ്രമിക്കുകയാണെന്നും യാത്രയ്ക്കുള്ള പണത്തിന്റെ ഉറവിടം ചോദിച്ച് നോട്ടീസ് നൽകിയെന്നും ദീപ്‌കെ ആരോപിച്ചു.
ഡൽഹി പോലീസിന്റെ നടപടികൾ കേന്ദ്ര ആഭ്യന്തര മന്ത്രി അമിത് ഷായുടെ നിർദ്ദേശപ്രകാരമാണെന്നും രാജ്യത്ത് ജനാധിപത്യം വലിയ ആക്രമണം നേരിടുകയാണെന്നും ഐസ പ്രസിഡന്റ് നേഹ ബോറ ആരോപിച്ചു. ജനകീയ പ്രക്ഷോഭത്തിന് മുന്നിൽ നേരത്തെ കേന്ദ്ര മന്ത്രിക്ക് രാജി വെക്കേണ്ടി വന്നിട്ടുണ്ടെന്നും അടുത്തത് മുഖ്യ തെരഞ്ഞെടുപ്പ് കമ്മീഷണറാണെന്നും അവർ കൂട്ടിച്ചേർത്തു. ഭാവി സമരപരിപാടികൾ ആസൂത്രണം ചെയ്യുന്നതിനായി വിദ്യാർത്ഥി സംഘടനകൾ ഡൽഹി പ്രസ് ക്ലബ്ബിൽ യോഗം ചേരും.
