വാഷിങ്ടൺ: ഒമാൻ ഉൾക്കടലിൽ അമേരിക്കൻ നാവികസേനയുടെ കപ്പലുകളെ നിരീക്ഷിക്കുകയും ലക്ഷ്യമിടാൻ സഹായിക്കുകയും ചെയ്തെന്ന ആരോപണത്തെത്തുടർന്ന് ഇറാൻ ബന്ധമുള്ള പരമ്പരാഗത കപ്പൽ (ഉരു) തകർത്തതായി യുഎസ് സെൻട്രൽ കമാൻഡ് (സെന്റ്കോം) അറിയിച്ചു. ഒക്ടോബർ ആറിനാണ് സംഭവം നടന്നത്. കപ്പൽ തകർക്കുന്നതിന് മുമ്പ് അതിലുണ്ടായിരുന്ന ജീവനക്കാരെ സുരക്ഷിതമായി ഒഴിപ്പിച്ചതായും അവരെ സ്വദേശങ്ങളിലേക്ക് തിരിച്ചയക്കുന്നതിനുള്ള നടപടികൾ തുടരുകയാണെന്നും സെന്റ്കോം വ്യക്തമാക്കി.
ഒക്ടോബർ 14-നാണ് യുഎസ് സൈന്യം സംഭവത്തിന്റെ വിവരം പുറത്തുവിട്ടത്. ഇറാനുമായി ബന്ധമുള്ള ഉരു അമേരിക്കൻ നാവികസേനാ കപ്പലുകളുടെ നീക്കങ്ങൾ നിരീക്ഷിക്കുകയും അവയെ ലക്ഷ്യമിടുന്നതിനുള്ള വിവരങ്ങൾ കൈമാറുകയും ചെയ്തുവെന്നാണ് അമേരിക്കയുടെ ആരോപണം. എന്നാൽ, കപ്പലിലുണ്ടായിരുന്നവരുടെ ദേശീയതയോ അവരുടെ തിരിച്ചറിയൽ വിവരങ്ങളോ സൈന്യം വെളിപ്പെടുത്തിയിട്ടില്ല.
മേഖലയിലെ സമുദ്രപാതകളിലൂടെ സഞ്ചരിക്കുന്ന ആയിരക്കണക്കിന് സിവിലിയൻ നാവികരെയും അമേരിക്കൻ യുദ്ധക്കപ്പലുകളെയും ഇറാന്റെ ഇസ്ലാമിക് റെവല്യൂഷണറി ഗാർഡ് കോർപ്സ് (ഐആർജിസി) കഴിഞ്ഞ ഏഴുമാസമായി ലക്ഷ്യമിടുകയാണെന്നും സെന്റ്കോം ആരോപിച്ചു.
ഹോർമുസ് കടലിടുക്കിലും ഒമാൻ ഉൾക്കടലിലും അമേരിക്കയും ഇറാനും തമ്മിലുള്ള സംഘർഷം ശക്തമായ സാഹചര്യത്തിലാണ് പുതിയ നടപടി. എണ്ണവ്യാപാരത്തിനും അന്താരാഷ്ട്ര ചരക്കുനീക്കത്തിനും നിർണായകമായ മേഖലയിലെ കപ്പൽഗതാഗതം സമീപകാല ആക്രമണങ്ങളെത്തുടർന്ന് സുരക്ഷാ ആശങ്കകൾ നേരിടുകയാണ്.
അമേരിക്കയുടെ ആരോപണങ്ങളോട് ഇറാൻ ഔദ്യോഗികമായി പ്രതികരിച്ചിട്ടുണ്ടോയെന്ന കാര്യത്തിൽ വ്യക്തതയില്ല. കപ്പൽ നിരീക്ഷണത്തിലേർപ്പെട്ടിരുന്നുവെന്ന അമേരിക്കൻ വാദം സ്വതന്ത്രമായി സ്ഥിരീകരിച്ചിട്ടില്ല.
