തിരുവനന്തപുരം: മുൻ എൽഡിഎഫ് സർക്കാർ സംഘടിപ്പിച്ച രാജ്യാന്തര കായിക ഉച്ചകോടിയുമായി ബന്ധപ്പെട്ട് നിക്ഷേപ വഞ്ചനയും സാമ്പത്തിക തട്ടിപ്പും നടന്നെന്ന ആരോപണത്തിൽ സർക്കാരിന് പരാതി ലഭിച്ചതായി കായിക മന്ത്രി ഒ.ജെ. ജനീഷ്. പരാതിയിൽ അന്വേഷണം നടത്താൻ കായിക-യുവജനകാര്യ വകുപ്പ് സ്പെഷൽ സെക്രട്ടറിയെ ചുമതലപ്പെടുത്തിയതായി മന്ത്രി അറിയിച്ചു.
ഉച്ചകോടിയുടെ ഇവന്റ് മാനേജ്മെന്റ്, കാറ്ററിങ് കരാറുകൾ ടെൻഡർ നടപടികളില്ലാതെ മുൻ കായിക മന്ത്രിയുടെ അടുപ്പക്കാർക്ക് നൽകിയെന്ന ആരോപണവും സർക്കാരിന്റെ ശ്രദ്ധയിൽപ്പെട്ടിട്ടുണ്ട്. പരാതിയിലെ വിവരങ്ങൾ പരിശോധിച്ച് തുടർനടപടികൾ സ്വീകരിക്കാനാണ് വകുപ്പിന്റെ തീരുമാനം.
2024 ജനുവരിയിൽ തിരുവനന്തപുരത്താണ് രാജ്യാന്തര കായിക ഉച്ചകോടി സംഘടിപ്പിച്ചത്. സംസ്ഥാനത്തെ കായിക മേഖലയിലേക്ക് നിക്ഷേപം ആകർഷിക്കുകയും കായിക സമ്പദ്‌വ്യവസ്ഥ വികസിപ്പിക്കുകയും ചെയ്യുകയായിരുന്നു ഉച്ചകോടിയുടെ ലക്ഷ്യം. എന്നാൽ, പരിപാടിയുടെ നടത്തിപ്പിനും ചെലവുകൾക്കും നിക്ഷേപ വാഗ്ദാനങ്ങളുടെ യാഥാർഥ്യത്തിനും എതിരെ പിന്നീട് വിമർശനങ്ങൾ ഉയർന്നു.
ഉച്ചകോടിയിലൂടെ ആയിരക്കണക്കിന് കോടി രൂപയുടെ നിക്ഷേപ വാഗ്ദാനങ്ങൾ ലഭിച്ചതായി മുൻ സർക്കാർ അവകാശപ്പെട്ടിരുന്നു. എന്നാൽ, വാഗ്ദാനം ചെയ്ത നിക്ഷേപങ്ങൾ യാഥാർഥ്യമായില്ലെന്ന ആരോപണവും പദ്ധതികളുമായി ബന്ധപ്പെട്ട തുടർനടപടികൾ ഉണ്ടായില്ലെന്ന പരാതികളും ഉയർന്നിട്ടുണ്ട്.
ഉച്ചകോടിയുടെ നടത്തിപ്പിനായി ആദ്യം 88 ലക്ഷം രൂപയ്ക്കാണ് ഭരണാനുമതി നൽകിയിരുന്നതെങ്കിലും ആകെ ചെലവ് 3.62 കോടി രൂപയായി ഉയർന്നതായി റിപ്പോർട്ടുകളുണ്ട്. ചെലവുകളിലും കരാർ നടപടികളിലും ക്രമക്കേടുണ്ടായെന്ന ആരോപണങ്ങൾക്കിടെയാണ് ഇപ്പോൾ അന്വേഷണം പ്രഖ്യാപിച്ചിരിക്കുന്നത്.
അതേസമയം, പരാതികളിൽ അന്വേഷണം ആരംഭിച്ചിട്ടുണ്ടെങ്കിലും ആരോപണങ്ങൾ തെളിയിക്കപ്പെട്ടിട്ടില്ല. അന്വേഷണത്തിലെ കണ്ടെത്തലുകൾ പുറത്തുവന്നശേഷമേ ഉത്തരവാദിത്തം സംബന്ധിച്ച് വ്യക്തതയുണ്ടാകൂ.
