നഗോയ: ഏഷ്യൻ പാരാ ഗെയിംസിൽ ഷൂട്ടിങ്ങിൽ സ്വർണവും വെള്ളിയും നേടി ഇന്ത്യക്ക് മികച്ച തുടക്കം. വനിതകളുടെ 10 മീറ്റർ എയർ റൈഫിൾ സ്റ്റാൻഡിങ് എസ്.എച്ച്.1 വിഭാഗത്തിൽ മോണ അഗർവാൾ സ്വർണവും അവനി ലേഖറ വെള്ളിയും നേടി. ജപ്പാനിലെ ഐച്ചി–നഗോയയിൽ നടക്കുന്ന ഗെയിംസിന്റെ ആദ്യ ദിനത്തിലാണ് ഇന്ത്യൻ താരങ്ങളുടെ നേട്ടം.
ഫൈനലിൽ 250 പോയിന്റ് നേടിയാണ് മോണ സ്വർണം സ്വന്തമാക്കിയത്. ഇതോടെ ഏഷ്യൻ പാരാ ഗെയിംസ് റെക്കോർഡും മോണയുടെ പേരിലായി. 249.6 പോയിന്റ് നേടിയ അവനി ലേഖറ വെള്ളി മെഡൽ നേടി. ദക്ഷിണ കൊറിയയുടെ യുൻറി ലീ 227.9 പോയിന്റുമായി വെങ്കലം നേടി.
മുൻ ഗെയിംസിൽ ഇതേ ഇനത്തിൽ സ്വർണം നേടിയ അവനിയുടെ 249.6 പോയിന്റിന്റെ റെക്കോർഡാണ് മോണ മറികടന്നത്. യോഗ്യതാ റൗണ്ടിൽ 629.1 പോയിന്റ് നേടി മോണ പുതിയ ഏഷ്യൻ പാരാ ഗെയിംസ് യോഗ്യതാ റെക്കോർഡും സ്ഥാപിച്ചിരുന്നു.
ഇതോടെ ഇന്ത്യയുടെ മെഡൽപ്പട്ടികയ്ക്ക് തുടക്കമായി. പാരിസ് പാരാലിമ്പിക്സിൽ വെങ്കലം നേടിയ മോണ 2021ലാണ് റൈഫിൾ ഷൂട്ടിങ്ങിൽ മത്സരിക്കാൻ തുടങ്ങിയത്. ടോക്യോ, പാരിസ് പാരാലിമ്പിക്സുകളിൽ സ്വർണം നേടിയിട്ടുള്ള അവനി ലേഖറയുടെ വെള്ളി നേട്ടവും ഇന്ത്യൻ സംഘത്തിന് കരുത്തായി.
