സിഡ്നി: കടൽ കടന്നെത്തുമ്പോഴും മലയാളിയുടെ ഹൃദയത്തിൽ അണയാതെ കത്തുന്ന നാടിന്റെ തുടിപ്പും ഗന്ധവും കലയും പ്രവാസഭൂമിയിൽ പുനർജനിക്കുന്നു. സിഡ്‌നിയിലെ തിരക്കുപിടിച്ച പ്രവാസി ജീവിതത്തിനിടയിൽ, കേരളപ്പിറവിയുടെ ഓർമ്മകൾക്ക് പുതുജീവൻ പകർന്നുനൽകിക്കൊണ്ട് അരങ്ങേറുന്ന ‘മലയാൺമ 1’ (Malayanma 1) സാംസ്കാരിക സന്ധ്യ ഒക്ടോബർ 21 ബുധനാഴ്ച നടക്കും. കേവലമൊരു ആഘോഷം എന്നതിലുപരി, വരുംതലമുറയ്ക്കായി നമ്മുടെ തനത് അസ്തിത്വവും പൈതൃകവും വീണ്ടെടുക്കാനുള്ള ആഹ്വാനവുമായാണ് ഈ വേദി ഒരുങ്ങുന്നത്.
ഉത്സവയാനം ഇൻക്, സിഡ്‌നിയിലെ ഇന്ത്യൻ കോൺസുലേറ്റ്, ഇന്ത്യൻ കൗൺസിൽ ഫോർ കൾച്ചറൽ റിലേഷൻസ് (ICCR) എന്നിവരുടെ സംയുക്താഭിമുഖ്യത്തിൽ നടക്കുന്ന സംഗമം, ബുധനാഴ്ച വൈകുന്നേരം 5:30 മുതൽ 7:00 വരെ കാസിൽറെയ് സ്ട്രീറ്റിലുള്ള ഇന്ത്യൻ കോൺസുലേറ്റ് ഹാളിലാണ് (Level 2, 265 Castlereagh Street, Sydney) അരങ്ങേറുന്നത്.
നവതലമുറ ഇംഗ്ലീഷും വിദേശ സംസ്കാരവും ശീലമാക്കി സ്വന്തം വേരുകളിൽ നിന്ന് അകന്നുപോകാതിരിക്കാനും, തനത് മലയാളിത്തം അവരിലേക്ക് പകർന്നു നൽകാനുമുള്ള ഉത്തരവാദിത്തമാണ് ഈ ഒത്തുചേരൽ മുന്നോട്ടുവെക്കുന്നത്. ചെണ്ടയുടെ വന്യമായ താളവിസ്മയങ്ങളും, കഥകളിയുടെ ഗാംഭീര്യമുള്ള മുദ്രകളും, മോഹിനിയാട്ടത്തിന്റെ മനോഹരമായ ലാസ്യഭംഗിയും മറുനാടൻ വേദിയിൽ നിറയുമ്പോൾ, നമ്മുടെ പാരമ്പര്യത്തോടും ഭാഷയോടും നീതിപുലർത്താനുള്ള ഓരോ പ്രവാസിയുടെയും മനസാക്ഷിയുണർത്തുന്ന സന്ദേശമായി അത് മാറും. നിലവിളക്കിന്റെ പ്രഭയിൽ മലയാൺമയുടെ പെരുമ തെളിയുന്ന ഈ അസുലഭ നിമിഷങ്ങൾക്ക് സാക്ഷ്യം വഹിക്കാൻ എല്ലാ പ്രവാസി മലയാളികളെയും സംഘാടകർ സ്വാഗതം ചെയ്തു
