തിരുവനന്തപുരം: ഇന്ത്യയും ഓസ്ട്രേലിയയും തമ്മിലുള്ള അഞ്ചാമത് സംയുക്ത സൈനികാഭ്യാസമായ ‘ഓസ്ട്രഹിന്ദ് 2026’ തിരുവനന്തപുരത്ത് ആരംഭിച്ചു. ഒക്ടോബർ 19-ന് ഫോറിൻ ട്രെയിനിങ് നോഡിൽ തുടങ്ങിയ സംയുക്ത പരിശീലനം നവംബർ ഒന്ന് വരെ നീണ്ടുനിൽക്കും. തീരദേശ, ദ്വീപ് മേഖലകളിലെ സവിശേഷ സൈനിക നീക്കങ്ങൾ ലക്ഷ്യമിട്ട് സംഘടിപ്പിച്ചിട്ടുള്ള ഈ സംയുക്ത അഭ്യാസത്തിൽ ഇരു രാജ്യങ്ങളിൽ നിന്നുമുള്ള 120 വീതം സൈനികർ ഉൾപ്പെടെ ആകെ 240 സൈനികരാണ് പങ്കെടുക്കുന്നത്.
ഇന്ത്യൻ സൈന്യത്തെ പ്രതിനിധീകരിച്ച് ഗഡ്‌വാൾ റൈഫിൾസിലെ സൈനികരും മറ്റ് അനുബന്ധ വിഭാഗങ്ങളുമാണ് പങ്കെടുക്കുന്നത്. ഓസ്ട്രേലിയൻ കരസേനയുടെ പതിമൂന്നാം ബ്രിഗേഡിൽ നിന്നുള്ള സൈനികരാണ് അണിനിരക്കുന്നത്. കൂടാതെ, ചരിത്രത്തിലാദ്യമായി ന്യൂസിലൻഡിൽ നിന്നുള്ള ഒരു നിരീക്ഷക സംഘവും സൈനികാഭ്യാസത്തിന് സാക്ഷ്യം വഹിക്കാൻ എത്തിയിട്ടുണ്ട്; എങ്കിലും പരിശീലനം ഇന്ത്യയും ഓസ്ട്രേലിയയും തമ്മിലുള്ള ഉഭയകക്ഷി പങ്കാളിത്തമായിത്തന്നെ തുടരും.
ഉഭയകക്ഷി പ്രതിരോധ സഹകരണം കൂടുതൽ ദൃഢമാക്കിക്കൊണ്ട് ഉഭയജീവി സ്വഭാവമുള്ള സാഹചര്യങ്ങളിലാണ് ഇത്തവണ പരിശീലനം ക്രമീകരിച്ചിരിക്കുന്നത്. ഓസ്ട്രേലിയൻ കരസേനയുടെ ലിറ്ററൽ മാനുവർ വികസന പദ്ധതിയും ഇന്ത്യൻ സൈന്യത്തിന്റെ മുൻപരിചയവും സംയോജിപ്പിച്ചാണ് സംയുക്ത തന്ത്രങ്ങൾ രൂപപ്പെടുത്തുന്നത്. തീരദേശ-ദ്വീപ് പരിതസ്ഥിതികളിലെ സബ്-കൺവെൻഷണൽ ഓപ്പറേഷനുകൾ, സംയുക്ത ആസൂത്രണം, തന്ത്രപ്രധാന നീക്കങ്ങൾ, അത്യാധുനിക പോരാട്ട രീതികൾ എന്നിവ പരിശീലനത്തിൽ ഉൾപ്പെടുത്തിയിട്ടുണ്ട്.
കൂടാതെ നിരീക്ഷണം, രഹസ്യാന്വേഷണം, തന്ത്രപ്രധാന ഇൻസ്റ്റാളേഷനുകളുടെ സംരക്ഷണം, മാനുഷിക സഹായം, പ്രകൃതിദുരന്ത നിവാരണ പ്രവർത്തനങ്ങൾ തുടങ്ങിയവയും സംയുക്ത പരിശീലനത്തിന്റെ ഭാഗമാണ്. ഇന്ത്യയിലും ഓസ്ട്രേലിയയിലുമായി മാറിമാറി സംഘടിപ്പിക്കുന്ന ഈ പരമ്പരയുടെ നാലാം പതിപ്പ് 2025 ഒക്ടോബറിൽ പെർത്തിലെ ഇർവിൻ ബാരക്സിലാണ് നടന്നത്. ഇന്തോ-പസഫിക് മേഖലയിലെ സമാധാനവും സുരക്ഷയും ലക്ഷ്യമിട്ട് ഇരു രാജ്യങ്ങളും തമ്മിലുള്ള നാവിക, വ്യോമ പ്രതിരോധ സഹകരണങ്ങൾക്കൊപ്പം സൈനിക രംഗത്തെ പരസ്പര ഏകോപനം കൂടുതൽ ശക്തിപ്പെടുത്താൻ ഈ സംയുക്ത സൈനികാഭ്യാസം വഴിയൊരുക്കും.
