സിഡ്നി: ഓസ്ട്രേലിയൻ റേഡിയോ രംഗത്തെ പ്രമുഖ വ്യക്തിത്വവും എബിസി റേഡിയോ സിഡ്നിയിലെ (ABC Radio Sydney) ജനപ്രിയ അവതാരകനുമായ ജയിംസ് വാലന്റൈൻ (James Valentine) സജീവ മാധ്യമ പ്രവർത്തനത്തിൽ നിന്നും വിരമിക്കുന്നു. അർബുദ ബാധയെത്തുടർന്ന് ചികിത്സയിലായിരുന്ന അദ്ദേഹം, തന്റെ ആരോഗ്യനില പരിഗണിച്ചാണ് ഈ വൈകാരികമായ തീരുമാനമെടുത്തത്.
തിങ്കളാഴ്ച ഉച്ചയ്ക്ക് എബിസി റേഡിയോയിലെ ‘ആഫ്റ്റർനൂൺസ്’ (Afternoons) പ്രോഗ്രാമിലൂടെയാണ് 64-കാരനായ വാലന്റൈൻ തന്റെ വിരമിക്കൽ വാർത്ത ഔദ്യോഗികമായി അറിയിച്ചത്. തന്റെ ആരോഗ്യത്തിന് ഇപ്പോൾ കൂടുതൽ ശ്രദ്ധ ആവശ്യമാണെന്നും കുടുംബത്തോടൊപ്പം സമയം ചെലവഴിക്കാൻ ആഗ്രഹിക്കുന്നുവെന്നും അദ്ദേഹം പറഞ്ഞു.
2024-ൽ അന്നനാളത്തിലെ അർബുദം (Oesophageal Cancer) സ്ഥിരീകരിച്ചതിനെത്തുടർന്ന് അദ്ദേഹം കുറച്ചുകാലം അവധിയിലായിരുന്നു. പിന്നീട് റേഡിയോയിലേക്ക് തിരിച്ചെത്തിയെങ്കിലും രോഗം വീണ്ടും ബാധിച്ചതിനാൽ (Omentum Cancer) തുടർച്ചയായ ചികിത്സകൾ ആവശ്യമായി വരികയായിരുന്നു.
1980-കളിൽ എബിസി ടിവിയിലെ ‘ദി ആഫ്റ്റർനൂൺ ഷോ’യിലൂടെയാണ് അദ്ദേഹം കരിയർ ആരംഭിച്ചത്. കഴിഞ്ഞ 25 വർഷമായി എബിസി റേഡിയോ സിഡ്നിയിലെ ‘ആഫ്റ്റർനൂൺസ്’ പ്രോഗ്രാമിന്റെ മുഖമായിരുന്നു അദ്ദേഹം. സാക്സോഫോൺ കലാകാരൻ കൂടിയായ അദ്ദേഹം സംഗീത ലോകത്തും പ്രശസ്തനാണ്. വാലന്റൈന്റെ സ്മരണാർത്ഥം ഈ വെള്ളിയാഴ്ച (ഫെബ്രുവരി 6) എബിസി റേഡിയോയിൽ രണ്ട് മണിക്കൂർ നീളുന്ന പ്രത്യേക പരിപാടി സംപ്രേക്ഷണം ചെയ്യും.
