വാഷിംഗ്ടൺ: ലത്തീൻ ട്രാപ്പ് സംഗീതജ്ഞൻ ബാഡ് ബണ്ണി (Bad Bunny) നയിച്ച 60-ാമത് സൂപ്പർ ബൗൾ ഹാഫ് ടൈം ഷോയ്ക്കെതിരെ രൂക്ഷവിമർശനവുമായി യുഎസ് പ്രസിഡന്റ് ഡൊണാൾഡ് ട്രംപ്. ഷോ “അങ്ങേയറ്റം മോശം” (Abomination) ആണെന്നും ചരിത്രത്തിലെ തന്നെ ഏറ്റവും നിലവാരം കുറഞ്ഞ പ്രകടനങ്ങളിൽ ഒന്നാണെന്നും അദ്ദേഹം വിശേഷിപ്പിച്ചു. ഞായറാഴ്ച രാത്രി നടന്ന മത്സരത്തിന് പിന്നാലെ തന്റെ സോഷ്യൽ മീഡിയ പ്ലാറ്റ്ഫോമായ ‘ട്രൂത്ത് സോഷ്യലി’ലൂടെയായിരുന്നു ട്രംപിന്റെ പ്രതികരണം.
ഷോ പൂർണ്ണമായും സ്പാനിഷ് ഭാഷയിലായതിനെ ട്രംപ് കടുപ്പമേറിയ ഭാഷയിൽ വിമർശിച്ചു. “അയാൾ എന്താണ് പറയുന്നതെന്ന് ആർക്കും മനസ്സിലാകുന്നില്ല. നൃത്തമാകട്ടെ അങ്ങേയറ്റം മോശമാണ്, പ്രത്യേകിച്ച് ഇത് കാണുന്ന കൊച്ചുകുട്ടികൾക്ക്. കുതിച്ചുയരുന്ന ഓഹരി വിപണിയുമായി മുന്നേറുന്ന നമ്മുടെ രാജ്യത്തിന് നേരെ ലഭിച്ച ‘മുഖത്തടിയാണ്’ ഈ പ്രകടനം,” ട്രംപ് കുറിച്ചു. അമേരിക്കൻ മൂല്യങ്ങളെ ഷോ പ്രതിഫലിപ്പിക്കുന്നില്ലെന്നും മിക്കവാറും ഇംഗ്ലീഷ് ഒഴിവാക്കിയുള്ള പ്രകടനം നിരാശാജനകമാണെന്നും നിരവധി പ്രേക്ഷകരും അഭിപ്രായപ്പെട്ടു.
വിമർശനങ്ങൾ ഒരുവശത്ത് നിൽക്കുമ്പോഴും, സൂപ്പർ ബൗൾ ചരിത്രത്തിൽ ആദ്യമായാണ് ഒരു കലാകാരൻ പൂർണ്ണമായും സ്പാനിഷ് ഭാഷയിൽ ഹാഫ് ടൈം ഷോ അവതരിപ്പിക്കുന്നത് എന്നത് ശ്രദ്ധേയമായി. ലത്തീൻ സംഗീതത്തിന്റെയും സംസ്കാരത്തിന്റെയും ആഘോഷമായി മാറിയ ഷോയിൽ പ്രമുഖ താരങ്ങളുടെ സാന്നിധ്യവും ഉണ്ടായിരുന്നു:
അപ്രതീക്ഷിതമായി സ്റ്റേജിലെത്തിയ ലേഡി ഗാഗ ബാഡ് ബണ്ണിക്കൊപ്പം “Die With a Smile” എന്ന ഗാനത്തിന്റെ ലാറ്റിൻ വേർഷൻ അവതരിപ്പിച്ച് കാണികളെ ആവേശം കൊള്ളിച്ചു.ലാറ്റിൻ പോപ്പ് ഇതിഹാസം റിക്കി മാർട്ടിനും ഷോയിൽ മിന്നുന്ന പ്രകടനം കാഴ്ചവെച്ചു. ഇവർക്ക് പുറമെ കാർഡി ബി, പെഡ്രോ പാസ്കൽ തുടങ്ങിയവരും ഷോയുടെ ഭാഗമായി.
സൂപ്പർ ബൗളിന് മുന്നോടിയായി നടന്ന ഗ്രാമി അവാർഡ് ചടങ്ങിൽ ബാഡ് ബണ്ണി ട്രംപിന്റെ കുടിയേറ്റ നയങ്ങളെ വിമർശിച്ചത് വലിയ വാർത്തയായിരുന്നു. ഇതിന്റെ തുടർച്ചയായാണ് ഇപ്പോഴത്തെ ട്രംപിന്റെ വിമർശനമെന്നും വിലയിരുത്തപ്പെടുന്നു. ലത്തീൻ അമേരിക്കൻ വംശജർക്കിടയിൽ ഷോയ്ക്ക് വലിയ സ്വീകാര്യത ലഭിച്ചപ്പോൾ, ഇംഗ്ലീഷ് ഭാഷ ഒഴിവാക്കിയത് വലിയൊരു വിഭാഗം അമേരിക്കൻ പ്രേക്ഷകരെ അസ്വസ്ഥരാക്കിയിട്ടുണ്ട്. “വെറുപ്പിനേക്കാൾ ശക്തം സ്നേഹമാണ്” എന്ന സന്ദേശം സ്റ്റേഡിയത്തിലെ ജംബോട്രോണിൽ തെളിഞ്ഞതോടെയാണ് ഷോ അവസാനിച്ചത്
