സെൻട്രൽ കോസ്റ്റ്: കഴിഞ്ഞ മാസം കൻവാളിലെ ഒരു വീട് കേന്ദ്രീകരിച്ചുണ്ടായ സായുധ കവർച്ചയിലെ പ്രതികളെ കണ്ടെത്താൻ ന്യൂ സൗത്ത് വെയിൽസ് പോലീസ് സിസിടിവി ദൃശ്യങ്ങൾ പുറത്തുവിട്ടു. ഹെറിറ്റേജ് സ്ട്രീറ്റിലെ ഒരു വീട്ടിലേക്ക് തോക്കും ബേസ്ബോൾ ബാറ്റുമായി മുഖംമൂടി ധരിച്ച മൂന്നുപേർ അതിക്രമിച്ചു കയറുന്ന ദൃശ്യങ്ങളാണ് പോലീസ് പുറത്തുവിട്ടത്.
കഴിഞ്ഞ ഞായറാഴ്ച പുലർച്ചെ ഏകദേശം 2.20-ഓടെയായിരുന്നു സംഭവം. വീട്ടിലുണ്ടായിരുന്ന രണ്ട് സ്ത്രീകളെയും ഒരു പുരുഷനെയും തോക്കിൻമുനയിൽ നിർത്തി ഭീഷണിപ്പെടുത്തിയ അക്രമികൾ, പണവും മയക്കുമരുന്നും ആവശ്യപ്പെടുകയായിരുന്നു. വീട്ടിൽ നിന്നും വിവിധ സാധനങ്ങൾ കവർന്ന പ്രതികൾ ഒരു ഇ-ബൈക്കിലാണ് സംഭവസ്ഥലത്തുനിന്ന് രക്ഷപ്പെട്ടത്.
ഈ കുറ്റകൃത്യത്തിന് ‘നോമാഡ്സ്’ എന്ന അധോലോക മോട്ടോർ സൈക്കിൾ സംഘവുമായി ബന്ധമുണ്ടെന്ന സംശയത്തെത്തുടർന്ന് ‘സ്ട്രൈക്ക് ഫോഴ്സ് ബാൻക്രോഫ്റ്റ്’ (Strike Force Bancroft) എന്ന പ്രത്യേക അന്വേഷണ സംഘമാണ് നിലവിൽ കേസ് അന്വേഷിക്കുന്നത്. പുറത്തുവിട്ട ദൃശ്യങ്ങളിൽ കാണുന്ന വ്യക്തികളെ തിരിച്ചറിയാനോ അക്രമികളെക്കുറിച്ച് എന്തെങ്കിലും വിവരം ലഭിക്കാനോ പൊതുജനങ്ങൾ സഹായിക്കണമെന്ന് പോലീസ് അഭ്യർത്ഥിച്ചു.
