സിഡ്നി: ലോകമെമ്പാടും ക്രിസ്മസ് ലഹരിയില് അമരുമ്പോള്, ഓസ്ട്രേലിയയിലെ സിഡ്നിയില് ആഘോഷങ്ങള് വാനോളമുയരുന്നു. സിഡ്നിയിലെ വിഖ്യാതമായ സെന്റ് മേരീസ് കത്തീഡ്രലില് അരങ്ങേറുന്ന അതിമനോഹരമായ ലൈറ്റ് ആന്റ് സൗണ്ട് ഷോ കാണാന് പതിനായിരങ്ങളാണ് ഒഴുകിയെത്തുന്നത്.
ക്രിസ്തുവിന്റെ ജനനവും നന്മയുടെ സന്ദേശവും വിളിച്ചോതുന്ന മനോഹരമായ ദൃശ്യങ്ങളാണ് കത്തീഡ്രലിന്റെ ഭിത്തികളില് ലേസര് പ്രൊജക്ഷനിലൂടെ വിരിയുന്നത്.ഇത്തവണത്തെ ക്രിസ്മസ് ആഘോഷങ്ങളുടെ ഭാഗമായി ഉണ്ണിയേശുവിന്റെ ജനനത്തെ (Nativity scene) ആസ്പദമാക്കിയുള്ള പ്രത്യേക പ്രൊജക്ഷനുകള് കത്തീഡ്രലിന്റെ പ്രൗഢി വര്ദ്ധിപ്പിക്കുന്നു.
സന്ധ്യ മയങ്ങുന്നതോടെ കത്തീഡ്രല് മുറ്റം വര്ണ്ണപ്രഭയാല് നിറയുന്ന കാഴ്ച വിദേശ വിനോദസഞ്ചാരികള്ക്കും പ്രവാസികള്ക്കും ഒരേപോലെ ഹൃദ്യമായ അനുഭവമാണ് സമ്മാനിക്കുന്നത്.ലൈറ്റ് ഷോയ്ക്ക് പുറമെ കത്തീഡ്രല് ചത്വരത്തില് ഒരുക്കിയിട്ടുള്ള ക്രിസ്മസ് വിപണികളും (Market stalls), തത്സമയ ഗാനമേളകളും സിഡ്നിയുടെ ആഘോഷങ്ങള്ക്ക് മാറ്റ് കൂട്ടുന്നു. ഓസ്ട്രേലിയയിലെ മലയാളി സമൂഹവും വലിയ ആവേശത്തോടെയാണ് ഈ ചടങ്ങുകളില് പങ്കെടുക്കുന്നത്. വരും ദിവസങ്ങളിലും കത്തീഡ്രലില് വൈകുന്നേരം 8:30 മുതല് രാത്രി 10:30 വരെ ഈ ദൃശ്യവിസ്മയം തുടരും.
