കാൻബറ: 2025 സാമ്പത്തിക വർഷത്തിന്റെ ആദ്യ പകുതിയിൽ ഓസ്ട്രേലിയൻ സമ്പദ്വ്യവസ്ഥ അപ്രതീക്ഷിത മുന്നേറ്റം കാഴ്ചവെച്ചു. 2025-ന്റെ അവസാന മൂന്ന് മാസങ്ങളിൽ രാജ്യം 0.8 ശതമാനം വളർച്ച രേഖപ്പെടുത്തിയതായി ഓസ്ട്രേലിയൻ ബ്യൂറോ ഓഫ് സ്റ്റാറ്റിസ്റ്റിക്സ് (ABS) പുറത്തുവിട്ട കണക്കുകൾ വ്യക്തമാക്കുന്നു. ആഭ്യന്തര ഉൽപ്പാദനത്തിൽ (GDP) 0.6 ശതമാനം വളർച്ച മാത്രമാണ് സാമ്പത്തിക വിദഗ്ധർ മുൻകൂട്ടി പ്രവചിച്ചിരുന്നത്. എന്നാൽ ഈ പ്രതീക്ഷകളെ മറികടക്കുന്ന പ്രകടനമാണ് രാജ്യം കാഴ്ചവെച്ചത്.
കഴിഞ്ഞ വർഷം ഇതേ കാലയളവിനെ അപേക്ഷിച്ച് 2.6 ശതമാനം വാർഷിക വളർച്ചയും രാജ്യം കൈവരിച്ചു. ഇത് നേരത്തെ കണക്കാക്കിയിരുന്ന 2.1 ശതമാനത്തേക്കാൾ ഏറെ കൂടുതലാണ്. ഒട്ടുമിക്ക വ്യവസായ മേഖലകളിലും ഈ പാദത്തിൽ മികച്ച മുന്നേറ്റം പ്രകടമായതായി എബിഎസ് നാഷണൽ അക്കൗണ്ട്സ് വിഭാഗം മേധാവി ഗ്രേസ് കിം പറഞ്ഞു. എല്ലാ മേഖലകളെയും ഉൾക്കൊള്ളുന്ന സമഗ്രമായ സാമ്പത്തിക വളർച്ചയാണിതെന്നും അവർ കൂട്ടിച്ചേർത്തു.
തുടർച്ചയായ നാലാം പാദത്തിലും പ്രതിശീർഷ ജിഡിപിയിൽ വർദ്ധനവുണ്ടായിട്ടുണ്ട് എന്നത് ശ്രദ്ധേയമാണ്. മുൻവർഷത്തെ അപേക്ഷിച്ച് പ്രതിശീർഷ വരുമാനത്തിൽ 0.9 ശതമാനം വർദ്ധനവാണ് രേഖപ്പെടുത്തിയിരിക്കുന്നത്. 2022 ഡിസംബർ പാദത്തിന് ശേഷമുള്ള ഏറ്റവും ഉയർന്ന വാർഷിക വളർച്ചാ നിരക്കാണിത്. പണപ്പെരുപ്പവും ആഗോള സാമ്പത്തിക പ്രതിസന്ധികളും നിലനിൽക്കുന്ന സാഹചര്യത്തിലും ഓസ്ട്രേലിയൻ സമ്പദ്വ്യവസ്ഥ കരുത്ത് കാട്ടുന്നത് നിക്ഷേപകർക്കും വലിയ ആശ്വാസമാണ് നൽകുന്നത്.
